बियालिस सय मिटरमा दौड तथा तेत्तिस सय मिटरमा याक तथा चौंरी प्रर्दशनी कार्यक्रम गरेर सिरिजङ्गा पर्यटन महोत्सव

खगेन्द्र अधिकारी
ताप्लेजुङ,चैत ६ । ताप्लेजुङको सिरिजङ्गा गाउँपालिकाले ४ हजार २ सय मिटर उचाईमा खुल्ला हाफ म्याराथन तथा ३ हजार ३ सय मिटर उचाईमा चौंरी तथा याक प्रर्दशनी सहितका कार्यक्रम गरेर सिरिजङ्गा पर्यटन महोत्सव मनाउने भएको छ ।

आयोजक सिरिजङ्गा गाउँपालिकाले बुधवार फुङलिङमा पत्रकार सम्मेलनको आयोनना गर्दै महोत्सवका बारेमा बताएको हो । पालिका अध्यक्ष लालकृष्ण चौहानका अनुसार याम्फुदिनको नयाँ झोरेनी कार्यक्रमको मुख्य स्थल हुने छ । जो, ३ हजार ३ सय ७ मिटरको उचाईमा रहेको छ । चौंरी तथा याक प्रर्दशनी सहित महोत्सवका मुख्य कार्यक्रमहरु नयाँ झोरेनीमा हुने छ भने उक्त स्थानबाट करिव २२ किलोमिटर दुरीमा रहेको समुद्र सहतबाट ४ हजार २ सय ३० मिटर उचाईको दुन्दुडाँडा सम्मको साहसिक खुल्ला हाफ म्याराथन प्रतियोगिता सञ्चालन हुने छ ।

सिरिजङ्गा गाउँपालिकाका उपाध्यक्ष डाक्टर चित्रकुमार मावो लिम्बूका अनुसार पालिकाले निर्माण गरेको साहसिक पदमार्गको प्रचारप्रसार,कञ्चनजंघा हिमाल सहितका दर्जनौं पर्यटकिय स्थलहरुको अवलोकन भ्रमण तथा प्रवद्र्धन र स्थानीय व्यवसायीहरुलाई आफ्नो पेशा र क्षमता अनुसारको कार्य प्रवद्र्धनमा सहयोग पु¥याउन महोत्सव आयोजना हो ।‘समग्र सिरिजङ्गा क्षेत्रका पर्यटन प्रवद्र्धन गर्ने मुख्य उद्देश्य हो’उपाध्यक्ष मावोले भने । उक्त अवसरमा प्याराग्लाईडिङ् र माउन्टेन साइक्लिङ सहितका बिधाहरुको सम्भाव्यता अध्ययन भइरहेको र सम्भावना देखिएको अवस्थामा ति कार्यक्रम समेत महोत्सवका बेला समावेश गरिने उपाध्यक्ष मावोले बताउनुभयो ।

२०८२ साल बैशाख १३ देखि १५ गते सम्म महोत्सवको मुख्य कार्यक्रम भनिएपनि पालिकाले जलवायु परिवर्तनको असर र प्रभाव बारे समेत अध्ययन तथा खोजी कार्यक्रम हुने भएकोले समग्र कार्यक्रम भने बैशाख ५ गते देखि १५ गते सम्म सञ्चालन हुने पालिकाले बताएको छ । महोत्सवको अवसरमा राष्ट्रिय तथा स्थानीय कलाकारको सहभागितामा मुख्य कार्यक्रमस्थल झोरेनीमा साँस्कृतिक तथा साहित्यिक कार्यक्रम समेत सञ्चालन हुने भएको छ । चौंरी तथा याक प्रर्दशनी कार्यक्रम समेत खुल्ला राखिएकोले सबै क्षेत्रका चौंरी तथा याकहरु प्रर्दशनीमा ल्याउन सकिने आयोजकले बताएको छ । कार्यक्रम अनुसार बैशाख ५ देखि १३ गते सम्म जलवायु परिवर्तनको असर बारे अध्ययन तथा साहसिक पदमार्गको अवलोकन तथा निरीक्षण,१४ र १५ गते याक तथा चौंरी प्रर्दशनी,१५ गते कञ्चनजंघा हाफ म्याराथन प्रतियोगिता र साँझ साँस्कृतिक तथा साहित्यिक उत्सव कार्यक्रम हुने भएको छ ।

कार्यक्रमका लागि ५२ लाख रुपैयाँ बजेट लाग्ने अनुमान गरिएको पालिका उपाध्यक्ष मावोले जानकारी दिनुभयो । खुल्ला हाफ म्याराथनतर्फका बिजेताले नगद २ लाख ८ हजार ५ सय ८६ रुपैयाँ,उपबिजेताले १ लाख ८ हजार ५ सय ८६ रुपैयाँ र तृतीय हुनेले ५८ हजार ५ सय ८६ रुपैयाँ पुरस्कार पाउने छन् । यस्तै चौंरी तथा याक प्रर्दशनीमा प्रथम हुनेले २८ हजार ५ सय ८६ तथा अन्यलाई प्रोत्साहन स्वरुप ८ हजार ५ सय ८६ रुपैयाँका दरले पुरस्कार दिइने भएको छ । विश्वको तेस्रो तथा नेपालको दोस्रो अग्लो शिखर कञ्चनजंघाको उचाईलाई आधार मानेर पुरस्कारको अन्तिम अंक ८ हजार ५ सय ८६ रुपैयाँ निर्धारण भएको पालिकाले जनाएको छ । सो अवसरमा महोत्सवको आधिकारिक लोगो समेत सार्वजनिक गरिएको पालिकाका प्रमुख प्रशासकीय अधिकृत डम्बरबहादुर आङदेम्बेले जानकारी दिनुभयो ।