अपाङ्गता भएका व्यक्तिहरुको आयआर्जनमा टेवा पुर्याउन समूहगत लगानी गर्दै पाथीभरा याङवरक
खगेन्द्र अधिकारी
ताप्लेजुङ,फागुन १४ । अपाङ्गता भएका व्यक्तिहरुको आयआर्जनमा टेवा पुर्याउन ताप्लेजुङको पाथीभरा याङवरक गाउँपालिकाले समूहगत रुपमा रकम उपलब्ध गराउने भएको छ ।
गाउँपालिका अध्यक्ष केशरकुमार सुब्बाका अनुसार अपाङ्गता भएका व्यक्तिहरुको समूह बनाई प्रत्येक समूहलाई ५० हजार रुपैयाँका दरले रकम दिने प्रकृया सुरु गरेको हो । पाथीभरा याङवरक गाउँपालिकामा ६ वटा वडा रहेका छन् । प्रत्येक वडामा रहेका अपाङ्गता भएका व्यक्तिहरुलाई समूह बनाई प्रारम्भिक चरणमा तयार भएका ६ वटा समूहलाई प्रतिसमूह ५० हजार रुपैयाँका दरले रकम उपलब्ध गराइने छ । यो रकमलाई समूहमा आवद्ध अपाङ्गता भएका व्यक्तिहरुले तरकारीबाली उत्पादन,पशुचौपाया,बंगुर,संगुर,बाख्रा तथा कुखुरा पालन सहितका आयआर्जनका कार्यक्रममा ऋण स्वरुप केन्द्रित गर्ने पालिकाको योजना रहेको छ ।
पालिकाले अपाङ्गता भएका व्यक्तिहरुको समूहलाई ‘मिलीजुली समूह’नामाकरण गरी उक्त समूहलाई बचत तथा ऋण व्यवस्थापन सम्वन्धी अभिमुखीकरण समेत गराएको छ । गठित समूहलाई कानुन तथा कार्यविधिको अधिनमा रही बचत तथा ऋण परिचालनको अधिकार प्रदान गर्ने पालिकाको तयारी छ । पालिकाले समूहगत रुपमा प्रदान गर्ने उक्त ऋण रकम कार्यविधि प्रतिकुल नहुनेगरी समूहका सदस्यलाई आयआर्जनका कार्यक्रममा समूहको निर्णय अनुसार परिचालन गर्न अख्तियारी प्रदान गर्ने छ । पालिकाका महिला तथा बालबालिका शाखा प्रमुख पवित्रा थापाले उक्त रकम समूहका सदस्यले निश्चित अवधि सम्म प्रयोगमा ल्याउन पाउने र साँवा रकम फेरि समूहमै फिर्ता गर्नुपर्ने सर्त रहेको जानकारी दिनुभयो ।
पुँजी बृद्धिको अवधारणा अनुसार समूहमा बढेको रकम समूहकै रहनेगरी समूहका सदस्यले आयआर्जनका कार्यक्रममा लैजान पाउने पालिकाले जनाएको छ । अपाङ्गता रोकथाम तथा पुर्नस्थापना कार्यक्रम अन्तरगत उक्त कार्यक्रम सुरु भएको हो । पाथीभरा याङवरक गाउँपालिकामा २ सय ९१ जना अपाङ्गता भएका व्यक्तिहरु रहेका छन् । पुरानो तथ्याङ्कमा २ सय २६ जना रहेकोमा पालिकाले सञ्चालन गरेको अपाङ्गता भएका व्यक्तिहरुका लागि आयोजित स्वास्थ्य शिविर तथा अपाङ्गता पहिचान कार्यक्रमका क्रममा थप ६५ जना भेटिएका हुन् । करुणा फाउण्डेसन,कोशी प्रदेशको सामाजिक विकास मन्त्रालय र पाथीभरा याङवरक गाउँपालिकाको संयुक्त प्रयासमा अहिले पालिकास्तरमा अपाङ्गता रोकथाम तथा पुर्नस्थापना कार्यक्रम सञ्चालन भइरहेको छ ।
