बाढीले काठेपुल बगाउँदा यातायात सेवा अवरुद्ध

-प्रयास लिम्बू
ताप्लेजुङ, जेठ ३१ । ताप्लेजुङमा तमोर नदीसहितका खोलामा लगाइएको अस्थायी काठेपुल बाढीले बगाउँदा यातायात सेवा अवरुद्ध बनेको छ । बुधबार रातभर परेको वर्षासँगै तमोर नदी, सिँसावा खोला र सिस्ने खोलामा आएको बाढीले विभिन्न पाँच ठाउँमा रहेको काठेपुल (गाडी गुड्ने काठको पुल) बगाएपछि यातायात सेवा अवरुद्ध बनेको हो ।
जिल्लाको फक्ताङ्लुङ गाउँपालिकास्थित तमोर नदीको छिरुवा र तापेथोक बगरमा रहेको अस्थायी काठेपुल बाढीले बगाएको छ । यस्तै तापेथोकस्थित सिँसावा खोला तथा फुङ्लिङ नगरपालिका–१० फुरुम्बु र फक्ताङ्लुङ गाउँपालिका–३ लिङ्खिमको सिमाना भई बग्ने सिस्ने खोलामा रहेको दुईवटा काठेपुल बाढीले बगाएको छ ।
उक्त पुलहरु बाढीले बगाएपछि फक्ताङ्लुङ गाउँपालिका–३ लिङ्खिम, वडा ४ इखाबु, वडा ५ तापेथोक, वडा ६ लेलेप र वडा ७ ओलाङ्चुङगोलामा यातायात सेवा पूर्णरुपमा अवरुद्ध भएको छ । फक्ताङ्लुङ गाउँपालिकाका अध्यक्ष राजन लिम्बू (मुक्ति) का अनुसार बाढीले काठेपुल बगाउँदा र ठाउँ–ठाउँको सडक खण्डमा पहिरो गएका कारण बिहीबार बिहानैदेखि यातायात सेवा अवरुद्ध बनेको हो ।
खाम्लुङको दोभान, सदरमुकाम फुङ्लिङ हुँदै फक्ताङ्लुङ गाउँपालिका प्रवेश गर्ने तमोर कोरिडोर र फुङ्लिङ, सुकेटार, फुरुम्बु हुँदै लिङ्खिम जोड्ने मेची राजमार्गमा यातायात सेवा अवरुद्ध भएको अध्यक्ष लिम्बूले जानकारी दिनुभयो । यस्तै विभिन्न वडामा रहेका ग्रामीण सडकहरु पनि अवरुद्ध भएको उहाँले बताउनुभयो ।
त्यस्तै मिक्वाखोला गाउँपालिका–१ खोक्लिङको शान्तिचौकस्थित भस्मे खोलामा आएको बाढी र वडा ३ लिबाङको चिहानडाँडामा गएको पहिरोले भित्री सडकहरु अवरुद्ध बनेको प्रहरीले जनाएको छ । जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक कमलकुमार लुङगेलीका अनुसार फुरुम्बु र लिङ्खिम जोड्ने सिस्ने खोलामा रहेको एक झोलुङ्गे पुलसमेत बाढीले बगाएको छ । जिल्लामा बाढी पहिरोले पु¥याएको क्षतिको विवरण सङ्कलनको काम जारी रहेको लुङ्गेलीले जानकारी दिनुभयो ।
यसैगरी सिँसावा खोला र सिस्ने खोलामा आएको पहिरोसहितको बाढीले किसानले पालेका गाई र बङ्गुरसमेत बगाएको फक्ताङ्लुङ गाउँपालिका अध्यक्ष लिम्बूले जानकारी दिनुभयो । उहाँका अनुसार सिस्ने खोलामा आएको बाढीले सोही खोला दोभान तमोर नदी किनारमा रहेको क्रसर उद्योगमासमेत क्षति पुगेको छ । बाढी पहिरोले किसानको अलैँची बाली, मकैबाली, खेतीयोग्य जमिन र रुख तथा बोट बिरुवा बगाएर क्षति पु¥याएको छ ।
यता फक्ताङ्लुङ गाउँपालिकाका अध्यक्ष लिम्बूले विज्ञप्ति जारी गर्दै पालिकावासीलाई सतर्क र सुरक्षित रहन आग्रह गर्नु भएको छ । मनसुनका समयमा आइपर्ने जोखिम र प्राकृतिक विपतबाट बच्न र बचाउनका लागि पालिकावासीलाई सतर्क र सचेत रहन विज्ञप्ति प्रकाशित गरी अनुरोध गर्नु भएको हो । जल तथा मौसम विज्ञान कार्यालय धरान, ताप्लेजुङ फिल्ड कार्यालयका अनुसार जिल्लामा बितेको २४ घण्टामा १६.८ मिलिमिटर वर्षा भएको थियो ।