ताप्लेजुङ प्रहरीबाट उत्कृष्ट प्रहरीको रुपमा सम्मानित इन्सपेक्टर बस्नेत कोशी प्रदेशभरीकै सर्बोत्कृष्ट प्रहरी घोषित
उज्यालो पोष्ट
ताप्लेजुङ,कात्तिक १४ । जिल्ला प्रहरी कार्यालय ताप्लेजुङका प्रहरी निरीक्षक विवेक बस्नेत कोशी प्रदेश प्रहरी कार्यालयबाट असोज महिनाको उत्कृष्ट प्रहरी घोषित हुनु भएको छ । यसअघि उहाँ जिल्ला प्रहरी कार्यालय ताप्लेजुङबाट पनि असोज महिनाको उत्कृष्ट प्रहरी घोषित भएर ६९ औं प्रहरी दिवसका दिन असोज ३० गते सम्मानित हुनु भएको थियो ।
जिल्ला प्रहरी कार्यालय ताप्लेजुङका प्रहरी प्रमुख(डिएसपी)रवि रावलले बस्नेत कोशी प्रदेश प्रहरी कार्यालयबाट महिनाको सर्बोत्कृष्ट प्रहरी घोषित भएको पुष्टी गर्नुभयो । कोशी प्रदेश प्रहरी प्रमुख,प्रहरी नायव महानिरीक्षक(डिआईजी)चन्द्रकुबेर खापुङले महिनाको सर्बोत्कृष्ट प्रहरी घोषित हुनुभएका बस्नेतलाई सम्मान पत्र दिनुभएको छ ।
अबैध हातहतियार नियन्त्रण र फरार प्रतिवादी पक्राउ गरी कानुनी दाहेरामा ल्याउन सफल भई आम जनमानसमा प्रहरीको छबि उच्च बनाउने कार्य गर्नुका साथै अपराध अनुसन्धान शाखामा रही मुद्दाको अभियोजन कार्यलाई व्यवस्थित बनाउन उल्लेख्य भूमिका निर्वाह गरेको भन्दै कोशी प्रदेश प्रहरी कार्यालयले बस्नेतलाई महिनाको सर्बोत्कृष्ट प्रहरी घोषित गरेको छ ।
जिल्ला प्रहरी कार्यालय ताप्लेजुङको सूचना अधिकारी समेत रहनु भएका प्रहरी निरीक्षक बस्नेत सूचना प्रवाह र सूचना सम्प्रेषणमा समेत अब्बल देखिनु भएको छ । जिल्ला प्रहरी कार्यालय र मातहतका प्रहरी इकाईहरुमार्फत सम्पादित क्रियाकलापको सूचना प्रवाहमा समेत उल्लेख्य भूमिका निर्वाह गर्नु भएका बस्नेत जिम्मेवारी लिएर आएको छोटो अवधिमै कार्यकुशलतामा सफल देखिनु भएको छ ।
