सिकैँचामा सहिद परिवारलाई सम्मान
-उज्यालो पोष्ट
ताप्लेजुङ, फागुन १८ । ताप्लेजुङको सिरिजंघा गाउँपालिका–३ सिकैँचामा माओवादी जनयुद्धका सहिद परिवारलाई सम्मान गरिएको छ । सहिद सप्ताहको अवसरमा माओवादी केन्द्र वडाकमिटी सिकैँचाले शनिबार सहिद परिवारलाई सम्मान गरेको हो ।
माओवादी केन्द्रका केन्द्रीय सदस्य तथा ताप्लेजुङ इन्चार्ज खेलप्रसाद बुढाक्षेत्री (पराग), सिरिजंघा गाउँपालिका कमिटीका पदाधिकारी लगायतले सहिद परिवारलाई सम्मान गर्नुभएको हो । तत्कालीन माओवादी सशस्त्र युद्धमा सहभागी भएर ज्यान गुमाउने सिकैँचाका सहिद तीर्थ नेपाल, इन्द्र पौडेल, अशोक निरौला, शिवकुमार काङ्भा, कविराज योङ्हाङ र सन्तोष बुढाक्षेत्रीको परिवारलाई सम्मान गरिएको छ ।
माओवादी केन्द्र सिरिजंघा गाउँपालिका कमिटीका सहसचिव हेमन्त पौडेलका अनुसार सहिद परिवारलाई सम्मानपत्र प्रदान गरिएको छ । फागुन १४ देखि २१ गतेसम्म माओवादीले सहिद सप्ताहको रुपमा मनाउने गरेको छ ।
