ताप्लेजुङमा माओवादीको जनसम्बन्ध विस्तार अभियान सुरु

-अनिता पन्दाक
ताप्लेजुङ, चैत ८ । नेपाल कम्युनिस्ट पार्टी (माओवादी केन्द्र) ले ताप्लेजुङमा संगठन सुदृढीकरण तथा जनसम्बन्ध विस्तार अभियान सुरु गरेको छ । आउँदो बैशाखसम्म सञ्चालन गर्नेगरी माओवादी केन्द्रले बुधबारदेखि दुई महिने अभियान सुरु गरेको हो ।
ताप्लेजुङमा सुरु भएको संगठन सुदृढीकरण तथा जनसम्बन्ध विस्तार अभियानको माओवादी केन्द्रका केन्द्रीय सदस्य तथा कोशी प्रदेश केन्द्रीय–प्रदेश समन्वय समितिका कार्यालय सदस्य इन्द्र आङ्बो ‘मौसम’ ले उद्घाटन गर्नुभएको छ । माओवादी केन्द्र कोशी प्रदेश संसदीय दलका नेता तथा पूर्वमन्त्रीसमेत रहनुभएका आङ्बोले अभियानको शुभारम्भ गर्दै जनसम्बन्ध मजबुत भएमा मात्र पार्टी संगठन बलियो हुने बताउनुभयो ।
पार्टीको मूल आधार जनता भएकाले जनताबीचको सम्बन्धलाई बलियो र सुमधुर बनाउनुपर्नेमा नेता आङ्बोले जोड दिनुभयो । माओवादी जनयुद्धको बलबाट प्राप्त भएका व्यवस्था, परिवर्तन र उपलब्धिसँगै पार्टीले उठाएका मुद्दालाई रक्षा र संस्थागत गर्न आवश्यक रहेको उहाँले बताउनुभयो । परिवर्तनको रक्षा र संस्थागत गर्नका लागि माओवादी पार्टी नै बलियो र जिम्मेवार हुनुपर्ने उहाँको भनाइ थियो ।
यस्तै माओवादी केन्द्र कोशी प्रदेश समितिका अध्यक्ष हर्क नेम्बाङ ‘मिक्सो’ ले जनजीविकासँग जोडिएका विषयलाई प्राथमिकतामा राखेर पार्टीले आफ्नो गतिविधि गर्नुपर्ने बताउनुभयो । पार्टी र माओवादी नेतृत्वको सरकारले गरेका कामको प्रचार–प्रसार गर्दै जनयुद्धका कारण प्राप्त भएको परिवर्तनबारे जनतासमक्ष बुझाउन जरुरी रहेको उहाँले बताउनुभयो । उहाँले पार्टी बलियो भएमा मात्र सबै नेता कार्यकर्ताको भलाई हुने हुँदा बितेका तिता–मिठा कुरालाई बिर्सिएर एकजुट हुनुपर्नेमा पनि जोड दिनुभयो । ।
माओवादी केन्द्रका केन्द्रीय सदस्य तथा ताप्लेजुङ इन्चार्ज खेलप्रसाद बुडाक्षेत्री ‘पराग’ ले पार्टीलाई मजबुद बनाउनका लागि सबैले त्याग गर्न आवश्यक रहेको बताउनुभयो । जिम्मेवारी र काम गर्ने सिलसिलामा कतिपय सीमा कमजोरी हुनसक्ने बताउँदै बुडाक्षेत्रीले समीक्षा र सुधारको भावनासहित एकताबद्ध भई सक्रियता देखाउनुको अर्को विकल्प नहुने बताउनुभयो । उहाँले ताप्लेजुङमा माओवादी पार्टी निर्माण गर्न जुट्नका लागि सबै नेता कार्यकर्तालाई आग्रह पनि गर्नुभयो ।
कार्यक्रममा माओवादीका वैकल्पिक केन्द्रीय सदस्यद्वय मिङ्माडण्डु शेर्पा र पर्शुराम कार्की, प्रदेश समितिका सदस्य, सल्लाहकार लगायतको आतिथ्यता रहेको थियो । यता अभियान प्रारम्भ स्वरुप मंगलबार र बुधबार दुई दिन चलेको बैठकले अभियानलाई सफल बनाउन विभिन्न योजनासहित निर्णयहरु गरेको जिल्ला संयोजक विष्णुकुमार हाङ्बाङले जानकारी दिनुभयो ।
जिल्लाका नौवटै स्थानीय तहमा संगठन सुदृढीकरण र जनसम्बन्ध बिस्तारको अभियानलाई सफलतापूर्वक सम्पन्न गर्नेगरी योजना बनाएको हाङ्बाङले बताउनुभयो । उहाँका अनुसार अभियान सफल बनाउन जिल्लाका नेताहरुको तह र स्तरअनुसार जिम्मेवारी तथा कार्यक्षेत्र विभाजन गरिएको छ ।