ताप्लेजुङमा आर्युवेदका दुई औषधालय र चार आरोग्य सेवा केन्द्रले एकबर्षमा दिए १० हजार बढीलाई सेवा

खगेन्द्र अधिकारी
ताप्लेजुङ,कात्तिक २४ । आयुर्वेद सेवा प्रदान गर्ने ताप्लेजुङका २ औषधालय ४ पालिकामा रहेका नागरिक आरोग्य सेवा केन्द्रले आर्थिक बर्ष २०८१।८२ मा १० हजार बढी नागरिकलाई सेवा प्रदान गरेका छन् ।

जिल्ला आयुर्वेद स्वास्थ्य केन्द्र ताप्लेजुङले सोमवार फुङलिङमा आयोजना गरेको कार्यक्रममा उक्त निकायबाट १० हजार ३ सय ४५ जनाले सेवा लिएको बताईएको हो । जिल्ला आयुर्वेद स्वास्थ्य केन्द्र ताप्लेजुङका प्रमुख अजयकुमार झाका अनुसार ताप्लेजुङमा अहिले मैवाखोला गाउँपालिका र मेरिङदेन गाउँपालिकामा आर्युवेद औषधालय रहेका छन् । पाथीभरा याङवरकको थेचम्बु,सिदिङ्वाको साब्लाखु,आठराई त्रिबेणीको हाङपाङ र मिक्वाखोलाको साँवामा नागरिक आरोग्य सेवा केन्द्र रहेका छन् । फुङलिङ नगरपालिकामा जिल्ला आयुर्वेद स्वास्थ्य केन्द्रमार्फत सेवा प्रवाह हुने गरेको छ । यसो हुँदा फक्ताङलुङ गाउँपालिका र सिरिजङ्गा गाउँपालिकामा मात्र आर्युवेद स्वास्थ्य सेवा पालिका स्तरबाटै प्रवाह हुन नसकेको जिल्ला आयुर्वेद स्वास्थ्य केन्द्र ताप्लेजुङका प्रमुख झाले जानकारी दिनुभयो ।

आर्युवेद औषधालय मैवाखोलाका प्रमुख सुवासचन्द्र झाका अनुसार आव २०८१।८२ मा ३ हजार ६४ जनाले ओपिडी सेवा लिएका छन् । उक्त आवमा आर्युवेद औषधालय मेरिङदेनबाट १ हजार ५ सय ५२ जनाले सेवा लिएको औषधालयका प्रमुख रत्नेश्वरप्रसाद यादवले जानकारी दिनुभयो । आठराई त्रिबेणी गाउँपालिकाका नागरिक आरोग्य सहजकर्ता ध्यानकुमारी मगरका अनुसार आव २०८१।८२ मा १ हजार ५ सय ७५ जनाले सेवा लिएका छन् । मिक्वाखोलामा रहेको नागरिक आरोग्य सेवा केन्द्रमा कार्यरत सरस्वती चौधरीका अनुसार उक्त आवमा १ हजार ३ सय ९६ जनाले सेवा लिएका छन् । नागरिक आरोग्य सेवा केन्द्र सिदिङ्वाका आरोग्य सहजकर्ता अजितकुमार चौधरीका अनुसार त्यहाँबाट आव २०८१।८२ मा १ हजार ४ सय ६३ जनाले सेवा लिएका छन् । पाथीभरा याङवरकमा रहेको नागरिक आरोग्य सेवा केन्द्रमार्फत उक्त आवमा १ हजार २ सय ९५ जनाले सेवा लिएको उक्त केन्द्रका सहजकर्ता बिनोदकुमार यादवले जानकारी दिनुभयो ।

स्वस्थ्य नागरिक,स्वस्थ्य समाज र स्वस्थ्य जीवनको अवधारणालाई कार्यान्वयनमा ल्याउन टोल–टोलमा नागरिक आरोग्य केन्द्र सञ्चालन गर्ने सरकारको नीति अनुरुप नेपाल सरकार स्वास्थ्य मन्त्रालयले नागरिक आरोग्य कार्यक्रम सञ्चालन निर्देशिका २०७६ लागु गरी कार्यान्वयनमा ल्याएको छ । नागरिक आरोग्य सेवा केन्द्रका सहजकर्ताहरुले नागरिक आरोग्य अभियान्ताको रुपमा काम गर्नुपर्ने निर्देशिकाले भनेको छ । जिल्ला आयुर्वेद स्वास्थ्य केन्द्र ताप्लेजुङका प्रमुख अजयकुमार झाले आयुर्वेद स्वास्थ्य केन्द्रमार्फत पञ्चकर्म सहितका सुविधा प्रदान भइरहेको जानकारी दिनुभयो । नागरिकलाई स्वस्थ्य र सुरक्षित राख्न पैरवी गर्नेदेखि आर्युवेद उपचारमा संलग्न गराउनुसम्मका कामहरु नागरिक आरोग्य अभियान्ताले गर्नेछन् ।

बार्षिक समिक्षा कार्यक्रममा जिल्ला समन्वय समिति प्रमुख छिरिङ लामा,प्रमुख जिल्ला अधिकारी शिवराज सेढाईँ र जिल्ला रेडक्रस सोसाईटीका सभापति इन्द्रबहादुर मेघी गुरुङले आर्युवेद स्वास्थ्य सेवाको थप प्रभावकारिताका लागि आगामी दिनमा चाल्नुपर्ने बिभिन्न कदमका बारेमा सुझाव प्रस्तुत गर्नुभयो । जिसस प्रमुख लामाले आफ्नै भवन समेत नभएर सेवा दिन कठिनाई भइरहेको जिल्ला आर्युवेद स्वास्थ्य केन्द्रको भवन निर्माणका लागि जग्गाको खोजी भइरहेकोले यस कार्यमा सघाउन सबैको सहयोगको याचना समेत गर्नुभयो