फुसको छानो बिस्थापन कार्यक्रम अघि बढाउँदै मैवाखोला,मागियो आबेदन

खगेन्द्र अधिकारी
ताप्लेजुङ,चैत २१ । ताप्लेजुङको मैवाखोला गाउँपालिकाले लाभग्राही समूहमा सहभागी हुन नसक्ने बाहेक पालिकाका सबैघरधुरीको फुसको छाना बिस्थापन गर्ने कार्यक्रम अघि सारेको छ ।

गाउँपालिकाले कार्यविधिनै बनाई फुसको छाना बिस्थापन कार्यक्रम अघि सारी चैत २० गतेका गतेका मितिले १५ दिन भित्रमा सम्वन्धित वडामा आबेदन गर्न पालिकाबासीलाई आवह्वान गरेको छ । पालिकाका निमित्त प्रमुख प्रशासकीय अधिकृत लक्ष्मीमाया गोम्देनका अनुसार फुसको छाना बिस्थापन कार्यक्रममा सहभागी हुन चाहने घरमुलीले सम्वन्धित वडा कार्यालयमा तोकिएको समय भित्र आबेदन गर्नुपर्ने हुन्छ । आबेदक घरमुलीले परिवार संख्या र नाम सहितको विवरण समावेश भएको हस्तलिखित निबेदन,परिवारका सदस्यहरुको नागरिकताको प्रमाणपत्र भए सोको प्रतिलिपि,घर रहेको जग्गाको धनीपूर्जाको प्रमाणित प्रतिलिपि,हाल बसोबास गरिरहेको घरको पूर्ण आकृति देखिने फोटो र लाभग्राही समूहमा सहभागी हुन नसक्ने भन्दा बाहेकको अवस्था रहेको स्वघोषणा संलग्न राख्नुपर्ने पालिकाले जनाएको छ ।

मैवाखोला गाउँपालिकाको फुसको छाना बिस्थापन कार्यक्रम कार्यान्वयन कार्यविधि २०८१ अनुसार लाभग्राही समूहमा सहभागी हुन नसक्ने भनी ८ वटा बुँदा सूचिकृत गरिएको छ । सूचिकृत बुँदामा परेका व्यक्तिहरुले भने फुसको छानो बिस्थापन कार्यक्रममा सहभागी हुन पाउने छैनन् । जसअनुसार गाउँपालिका भित्र एक भन्दा बढी घर रहेको र कम्तिमा एकघरको फुसको छानो बिस्थापन भएको,घर फुसले तथा गोठ तथा भण्डारण घर जस्तापाता वा ढुङ्गाले छाएका परिवार र जस्तापाता पाउनकै लागि वा लाभग्राही समूहमा सहभागिता जनाउन छुट्टिएको परिवारलाई फुसको छानो बिस्थापन कार्यक्रमको लाभग्राही मानिने छैन ।

लाभको पद लिएका(सरकारी वा गैर सरकारी संघसंस्थामा कार्यरत)परिवार,एक भन्दा बढी घर जिल्ला भित्र वा बाहिर समेत भएका परिवार,गाउँपालिका भित्र कम्तिमा एक घर पक्की घर भएका व्यक्तिका परिवार,वडा कार्यालयबाट लाभग्राहीको रुपमा सिफारिस नभएका परिवार र अन्य पालिका वा अन्य क्षेत्रबाट आई अरुको घरमा रुँघालु बसेका परिवार समेत फुसको छानो बिस्थापन कार्यक्रमको लाभग्राहीमा पर्ने छैनन् ।

सम्वन्धित वडाले लाभग्राहीको सूची तयार गर्दा प्राकृतिक तथा अन्य विपद्ले घरबारबिहिन भएको परिवार,गाउँपालिका भित्र अपाङ्ग घरमुली भएको व्यक्ति वा परिवार,गाउँपालिकाभित्र पहिचान भएका विपन्न तथा गरिव घर परिवार,परिवारमा संरक्षक नभएको असाहाय,जेष्ठ नागरिक,महिला तथा बालबालिका भएको परिवार,गाउँपालिका भित्र स्थायी बसोबास भएका एकल महिला भएको घर तथा परिवार,आर्थिक,सामाजिक र साँस्कृतिक पछाडि पारिएका दलित,आदिवासी जनजाति तथा अल्पसंख्यक परिवार र गाउँपालिका भित्र फुस तथा अन्य यस्तै सामग्रीले छाना निर्माण गरी बसेको परिवारलाई प्राथमिकता दिनुपर्ने कार्यविधिमा उल्लेख गरिएको छ । फुसको छाना बिस्थापन कार्यक्रमका लागि छनौट भएका लाभग्राहीलाई पालिकाले घरको छानो लगाउने कार्यमा कर्कटपाता(जस्तापाता)उपलब्ध गराउने छ ।