सडकमा मृत भेटिएका केदेमको मृत्यु सवारीको ठक्करबाट भएको प्रहरीको प्रारम्भिक निश्कर्ष,एक चालक पक्राउ

उज्यालो पोष्ट
ताप्लेजुङ,फागुन २५ । यही फागुन २१ गते ताप्लेजुङको मेरिङदेन गाउँपालिकामा पर्ने नेवार खोल्साको सडकमा मृत भेटिएका स्थानीय ४१ बर्षिय हर्कवीरको मृत्यु सवारको ठक्करबाट मृत्यु भएको प्रहरीले प्रारम्भिक जानकारी सार्वजनिक गरेको छ ।

सडकमा क्षतबिक्षत अवस्थामा मृत भेटिएका केदेमको मृत्यु सम्वन्धमा अनुसन्धान थालेको प्रहरीले सो क्षेत्रमा ट्रक चलाउने चालक मोरङ जिल्लाको सुन्दरहरैंचा नगरपालिका वडा न ५ बस्ने २३ बर्षिय सञ्जित विक(कामी)लाई पक्राउ गरी अनुसन्धान सुरु गरेको छ । जिल्ला प्रहरी कार्यालय ताप्लेजुङका प्रवक्ता तथा सूचना अधिकारी प्रहरी निरीक्षक विवेक बस्नेतले केदेमको मृत्यु सवारीको ठक्करबाट भएको निश्कर्षका आधारमा थालिएको सुक्ष्म अनुसन्धानका क्रममा उक्त तथ्य भेटिएको जानकारी दिनुभयो । सडकमा केदेमको शव क्षतबिक्षत अवस्थामा भेटिएपछि प्रहरीले सवारीको ठक्करबाट उनको मृत्यु भएको आशंकामा दोभानबाट घटनास्थलबाट गएका सवारीमाथि निगारानी राखी अनुसन्धान गरेको थियो ।

प्रहरीका अनुसार घटनाको दिन फागुन २० गते दोभान बजारको बाटो हुँदै घटनास्थलतर्फ गएको प्र.१–०२–००१ख ९३३४ नम्बरको ट्रकको ठक्करबाट केदेमको मृत्यु भएको प्रारम्भिक अनुसन्धानबाट खुलेको छ । सोहि आधारमा प्रहरीले ट्रकका चालक सञ्जितलाई नियन्त्रणमा लिएर विस्तृत अनुसन्धान थालेको जनाएको छ । पक्राउ परेका चालक सञ्जित माथि फौजदारी कार्यविधि संहिता २०७४ को दफा १४ बमोजिम ताप्लेजुङ जिल्ला अदालतबाट ७ दिनको म्याद लिई घटनाको सम्वन्धमा विस्तृत अनुसन्धान भइरहेको जिल्ला प्रहरी कार्यालय ताप्लेजुङले जनाएको छ । मेरिङदेन गाउँपालिका वडा नं २ सान्थाक्रा घर भएका केदेमको शव फागुन २१ गते बिहान नेवार खोल्साको सडकमा क्षतविक्षत अवस्थामा भेटिएको थियो ।