विपद्बाट घरवास गुमाएका परिवारलाई घर बनाउने प्रयोजनमा ६० हजार रुपैयाँ उपलब्ध गराउँदै पाथीभरा याङवरक

खगेन्द्र अधिकारी
ताप्लेजुङ,फागुन १८ । ताप्लेजुङको पाथीभरा याङवरक गाउँपालिकाले विपद् प्रभावित परिवारलाई घर बनाउने प्रयोजनका लागि प्रति परिवार ६० हजार रुपैयाँ उपलब्ध गराउने भएको छ । उसले विपद्का घटनाबाट अत्यावश्यक दैनिक उपभोग्य सामग्री समेत गुमाएका परिवारका एकसरो आपतकालिन सामग्री समेत दिने भएको छ ।

आगलागीबाट घर गुमाएका पालिकाको वडा नं २ थेचम्बुका युवराज तामाङको परिवारलाई घर बनाउन ६० हजार रुपैयाँ बराबरको कर्कटपाता उपलब्ध गराउने पालिकाले घोषणा गरेको छ । आगलागीबाट घर गुमाएका परिवारलाई सान्त्वना दिन आपतकालिन राहत लिएर पुग्नु भएका पालिका अध्यक्ष केशरकुमार सुब्बाले पालिकाकोतर्फबाट आफुहरुले तत्काल कर्कटपाता उपलब्ध गराउने जानकारी दिनुभयो ।‘श्रमदानको उपयोग गरेर अब घर बनाउने प्रकृया थाल्नुहोस्,हामी पालिकाकोतर्फबाट जस्तापाता उपलब्ध गराउने छौं’पालिका अध्यक्ष सुब्बाले आगलागी पीडित तामाङ परिवारलाई भन्नुभयो । पालिकाले आगलागी पीडित परिवारलाई आपतकालिन राहत समेत उपलब्ध गराएको छ ।

पालिका अध्यक्ष सुब्बाका अनुसार पालिकाले विपद्बाट घरबास गुमाएका परिवारलाई पुर्नस्थापनामा सघाउन पालिकाले घर बनाउने प्रयोजनका लागि प्रतिघर ६० हजार रुपैयाँ बराबर सहयोग गर्ने कानुनी व्यवस्था नै गरेको छ ।‘कतिपय विपद् प्रभावित घर बनाउन ढिला गर्ने र पछि रकम माग गर्न आउने गर्नुहुन्छ’पालिका अध्यक्ष सुब्बाले भन्नुभयो ‘ अब विपद्बाट घरवास गुमाएका परिवारले पुर्नबासका लागि तत्काल घर बनाउने योजना सुरु गरे हामी पालिकाकोतर्फबाट ६० हजार रुपैयाँ उपलब्ध गराउँछौं’ । जिल्ला प्रहरी कार्यालय ताप्लेजुङका प्रवक्ता तथा सूचना अधिकारी प्रहरी निरीक्षक विवेक बस्नेतका अनुसार तामाङको ढुङ्गा,माटो,बाँस र चित्राले बनेको घर जल्दा करिव २ लाख ३० हजार रुपैयाँ बराबरको क्षति भएको । बिद्युत सर्ट भई आगलागी भएको अनुमान गरिएको प्रहरीले जनाएको छ ।