चौथो सिरिजङ्गा गोल्डकप तथा सिरिजङ्गा मेला सञ्चालन पछि तेल्लोक स्पोर्टिङ क्लवको बचत तीनलाख हाराहारी

खगेन्द्र अधिकारी
ताप्लेजुङ,फागुन १७ । ताप्लेजुङको सिरिजङ्गा गाउँपालिका वडा नं ४ स्थित तेल्लोक स्पोर्टिङले चौथो सिरिजङ्गा गोल्डकप तथा सिरिजङ्गा मेला सञ्चालनका क्रममा क्लवमा करिव तीन लाख रुपैयाँ बचत गर्न सफल भएको छ ।

चौथो सिरिजङ्गा गोल्डकप तथा सिरिजङ्गा मेला सम्पन्न भएपछि क्लवले शनिवार सार्वजनिक सुनुवाई गर्दै उक्त कार्यक्रममार्फत क्लवमा २ लाख ८९ हजार ७ सय १५ रुपैयाँ मौज्दात रहेको विवरण सार्वजनिक गरेको छ । चौथो सिरिजङ्गा गोल्डकप तथा सिरिजङ्गा मेला सञ्चालन तथा व्यवस्थापन समितिका आर्थिक संयोजक दिनेश भट्टराईका अनुसार १ लाख २५ हजार रुपैयाँ बोल कवोलको रकम क्लवको खातामा जम्मा हुन बाँकी छ । सो समेत प्राप्त भएमा क्लवको खातामा ४ लाख १४ हजार ७ सय १५ रुपैयाँ बचत हुने छ । भट्टराईका अनुसार चौथो सिरिजङ्गा गोल्डकप तथा सिरिजङ्गा मेलामा ३१ लाख १५ हजार ७ सय ६० रुपैयाँ आम्दानी भएकोमा २८ लाख २६ हजार ४५ रुपैयाँ खर्च भएको छ ।

जिल्ला खेलकुद विकास समितिका अध्यक्ष नरेन्द्रकुमार(गणेश)मावो र क्लवका अध्यक्ष अर्जुन भट्टराईको उपस्थितिमा आर्थिक संयोजक भट्टराईले चौथो सिरिजङ्गा गोल्डकप तथा सिरिजङ्गा मेला २०८१ को आयव्यय विवरण प्रस्तुत गर्नु भएको हो । चौथो अन्तराष्ट्रिय आमन्त्रण सिरिजङ्गा गोल्डकप तथा सिरिजङ्गा मेला गत मंसिर २३ देखि २९ गते सम्म सञ्चालन भएको थियो । तेल्लोक स्पोर्टिङ क्लवले गोल्डकप तथा मेला सम्पन्न भएपछि सरोकारवालाको राय,सुझाव तथा गुनासो ग्रहण गर्न सार्वजनिक सुनुवाई समेत गर्ने परम्परालाई निरन्तरता दिएको छ । प्रतियोगिता सम्पन्न भएपछि प्राय आयव्यय विवरण मात्रै सार्वजनिक हुने गरेका छन् । तेल्लोक स्पोर्टिङ क्लवले भने सार्वजनिक सुनुवाई नै सञ्चालन गरेको छ ।

अन्तराष्ट्रिय आमन्त्रण चौथो सिरिजङ्गा गोल्डकपमा भारतको एक सहित नेपालका प्रतिष्ठित क्लव समेतका गरी ८ टिमको सहभागिता थियो । प्रतियोगितामा विजेता टिमलाई नगद २ लाख ५० हजार ५ सय ५५ रुपैयाँका साथ ट्रफी,मेडल र प्रमाण–पत्र तथा उपविजेता टिमलाई १ लाख २५ हजार ५ सय ५५ रुपैयाँका साथ ट्रफी,मेडल र प्रमाण–पत्र प्रदान गरिएको थियो । गोल्ड कपमा विधागत पुरस्कारको समेत व्यवस्था गरिएको थियो । बिधागत पुरस्कारतर्फ प्रत्येक खेलमा उत्कृष्ट खेल खेल्ने एक जनालाई नगद २ हजार १ सय रुपैयाँका साथ ‘म्यान अफ द म्याच प्रदान गरिएको थियो । त्यस्तै सर्वोत्कृष्ट खेलाडीलाई ७ हजार रुपैयाँ तथा सर्वाधिक गोलकर्ता,उत्कृष्ट गोलरक्षक,उत्कृष्ट डिफेन्डर र उत्कृष्ट मिडफिल्डरलाई समान नगद ४–४ हजार रुपैयाँका साथ ट्रफी,मेडल र प्रमाण–पत्र प्रदान गरिएको थियो ।