तेल्लोक स्पोर्टिङ क्लवको दोस्रो अधिबेशन तथा चौथो सिरिजङ्गा गोल्डकपको सार्वजनिक सुनुवाई फागुन १७ मा

खगेन्द्र अधिकारी
ताप्लेजुङ,फागुन १४ । ताप्लेजुङको सिरिजङ्गा गाउँपालिका वडा नं ४ स्थित तेल्लोक स्पोर्टिङले क्लवको दोस्रो अधिबेशनसंगै चौथो सिरिजङ्गा गोल्डकप तथा सिरिजङ्गा मेला सञ्चालन सम्वन्धी सार्वजनिक सम्वन्धी सुनुवाई गर्ने भएको छ ।

क्लवका अध्यक्ष अर्जुन भट्टराईका अनुसार यही फागुन १७ गते शनिवार क्लवको कार्यालय तेल्लोकमा उक्त कार्यक्रम आयोजना गर्न लागिएको हो । चौथो अन्तराष्ट्रिय आमन्त्रण सिरिजङ्गा गोल्डकप तथा सिरिजङ्गा मेला गत मंसिर २३ देखि २९ गते सम्म सञ्चालन भएको थियो । प्रतियोगितामा विजेता टिमलाई नगद २ लाख ५० हजार ५ सय ५५ रुपैयाँका साथ ट्रफी,मेडल र प्रमाण–पत्र तथा उपविजेता टिमलाई १ लाख २५ हजार ५ सय ५५ रुपैयाँका साथ ट्रफी,मेडल र प्रमाण–पत्र प्रदान गरिएको थियो ।

गोल्ड कपमा विधागत पुरस्कारको समेत व्यवस्था गरिएको थियो । बिधागत पुरस्कारतर्फ प्रत्येक खेलमा उत्कृष्ट खेल खेल्ने एक जनालाई नगद २ हजार १ सय रुपैयाँका साथ ‘म्यान अफ द म्याच प्रदान गरिएको थियो । त्यस्तै सर्वोत्कृष्ट खेलाडीलाई ७ हजार रुपैयाँ तथा सर्वाधिक गोलकर्ता,उत्कृष्ट गोलरक्षक,उत्कृष्ट डिफेन्डर र उत्कृष्ट मिडफिल्डरलाई समान नगद ४–४ हजार रुपैयाँका साथ ट्रफी,मेडल र प्रमाण–पत्र प्रदान गरिएको थियो ।

सिरिजङ्गा गोल्डकप तथा सिरिजङ्गा मेला सञ्चालनको आयव्यय विवरण सार्वजनिक गर्ने तथा उक्त कार्यक्रमबारे सरोकारवाला निकायको गुनासो तथा राय सुझाव ग्रहण गर्ने प्रकृया स्वरुप कार्यक्रम आयोजना गरिएको क्लवका अध्यक्ष भट्टराईले जानकारी दिनुभयो । उक्त कार्यक्रममार्फत सिरिजङ्गा गोल्डकप तथा सिरिजङ्गा मेलाका सहयोगी दाताहरुलाई सम्मान कार्यक्रम समेत गरिने भएको छ ।