सिकैचाको वडाध्यक्ष उपनिर्वाचनमा ८ सय ९१ मत मत खस्यो,मतगणना आजैबाट सुरु गर्ने तयारी

खगेन्द्र अधिकारी
ताप्लेजुङ,मंसिर १६ । ताप्लेजुङको सिरिजङगा गाउँपालिका वडा नं ३ सिकैचाको वडाध्यक्षका लागि भएको मतदानमा ८ सय ९१ मत खसेको छ ।

सिकैचाको उपनिर्वाचनमा १ हजार ५ सय २८ मतदाता रहेका थिए । मुख्य निर्वाचन अधिकृत तथा ताप्लेजुङ जिल्ला अदालतमा न्यायाधीस विकास श्रेष्ठका अनुसार सरस्वती मावि कुञ्जारी मतदान स्थलमा ३ सय २६ पुरुष र २ सय ८९ महिला गरी ६ सय १५ खसेको छ । दुर्गा मावि ओसे मतदानस्थलमा पुरुष १ सय ६० र महिला १ सय १६ गरी २ सय ७६ मत खसेको निमित्त जिल्ला निर्वाचन अधिकारी बान्दवराज दुलालले जानकारी दिनुभयो । सरस्वती मावि कुञ्जारी मतदान स्थलमामा १ हजार २६ र दुर्गा मावि ओसे मतदानस्थलमा ५ सय २ मतदाता थिए ।

सहायक मतदान अधिकृत दलबहादुर तामाङका अनुसार दुबै मतदानस्थलमा गरी ५८.१८ प्रतिशत मत खसेको छ । त्यहाँ नेपाली काँग्रेसबाट भीमकुमार लक्सम्बा लिम्बू,नेकपा एमालेका कुमारी साउदेन,नेकपा(माओवादी केन्द्र)का अम्बि साउदेन,राष्ट्रिय स्वतन्त्र पार्टीका देवीप्रसाद पौडेल र संघीय लोकतान्त्रिक राष्ट्रिय मञ्चबाट राजेन्द्र काङ्वा लिम्बू गरी ५ जना उम्मेदवार छन् ।

यसैबीच सिकैचाको वडाध्यक्ष उपनिर्वाचनको मतगणना आइतवार रातिबाटै सुरु गर्ने तयारी गरिएको छ । मुख्य निर्वाचन अधिकृत श्रेष्ठले मतगणना सुरु गर्ने प्रकृयामा सर्वदलिय बैठक बोलाईएको र बैठक पछि तत्कालै मतगणना सुरु गर्ने मुख्य निर्वाचन अधिकृतको कार्यालयको योजना रहेको बताउनुभयो । छलफलका लागि दलहरुलाई साढे ५ बजे बोलाईएको छ । मुख्य निर्वाचन अधिकृतको कार्यालयले मतगणनाका लागि तारजालीले घेरा बारेर मतगणनास्थल शनिवारै तयार गरिसकेको छ ।