ढुङ्गेसाँघुस्थित १३२ केभिए विद्युत सव स्टेशन प्रसारण लाइनको सफल परीक्षण
उज्यालो पोष्ट
ताप्लेजुङ चैत २४ । कोशी करिडोर अन्तर्गत ताप्लेजुङको मैवाखोला गाउँपालिका ढुङ्गेसाँघुस्थित १३२ केभिए विद्युत सव स्टेशन प्रसारण लाइनको शनिवार परीक्षण गरिएको छ ।
नेपाल विद्युत प्राधिकरणले निर्माण गरेको विद्युत प्रसारण लाईनको शनिवार सफल परीक्षण गरिएको मैवाखोला गाउँपालिकाका अध्यक्ष विजयप्रकाश वनेमले जानकारी दिनुभयो । यही क्षेत्रमा २२० केभिए प्रसारण लाइन समेत बन्ने छ । यो सँगै अव ताप्लेजुङ र आसपासका जिल्लाका नदी तथा खोलाबाट उत्पादित बिद्युत यही सब स्टेशनमा जडान गरी नेपाल बिद्युत प्राधिकरणले तेह्थुम बसन्तपुरस्थित २२० र १३२ केभिए विद्युत प्रसारण लाइनमा जडान गरी व्यवस्थापन गर्ने भएको छ ।
पहिलो चरणमा तमोर नदीबाट उत्पादित ७३ मेगावाट क्षमताको मध्य तमोर जलविद्युत आयोजनाबाट उत्पादित विद्युत यही चैत २७ गते यही प्रसारण लाइनमार्फत व्यवस्थापन गरी राष्ट्रिय प्रसारण लाइनमा जडान गर्ने तयारी भै रहेको छ । नेपाल बिधुत प्रसारण लाइनका उप महानिर्देशक दीर्घायुकुमार श्रेष्ठ र २२० प्रसारण लाइनका निर्देशक थर्कबहादुर थापाको उपस्थितिमा जडान परीक्षण गरिएको समेत गाउँपालिका अध्यक्ष वनेमले जानकारी दिनुभयो ।
