सिदिङ्वा बाहेक ताप्लेजुङका ९ मध्ये ६ स्थानीय तहको बजेट आउँदै,२ वटाले ल्याइसके

ताप्लेजुङ,असार १० । नीति तथा कार्यक्रम प्रस्तुत गर्ने पालिका अध्यक्ष नै कोरोना संक्रमित भइ आइसोलेसनमा रहेका कारण ताप्लेजुङको सिदिङ्वा गाउँपालिकाले बिहीबार(आज)बजेट नल्याउने भएको छ । ९ पालिका रहेको ताप्लेजुङमा असार ३ मा सिरिजंगाले र असार ९ मा मेरिङ्देन गाउँपालिकाले बजेट,नीति तथा कार्यक्रम ल्याइ सकेका छन् । बिहीबार फुङ्लिङ नगरपालिका सहित आठराइ त्रिबेणी गाउँपालिका,फक्ताङ्लुङ गाउँपालिका,मैवाखोला गाउँपालिका,पाथीभरा याङ्वरक गाउँपालिका र मिक्वाखोला गाउँपालिकाले बजेट ल्याउने भएका छन् । सिदिङ्वा गाउँपालिकाका प्रमुख प्रशासकीय अधिकृत सुमन लिङ्देन लिम्बूले पालिका अध्यक्ष नरबहादुर कडरिया संक्रमित भइ स्वास्थ्लाभ गरिरहनु भएका कारण बिहीबार नीति,कार्यक्रम तथा बजेट नआउने जानकारी दिनुभयो । स्थानीय तहले प्रत्येक बर्षको असार १० भित्र नीति,कार्यक्रम तथा बजेट ल्याउनुपर्ने संबैधानिक व्यवस्था रहेको छ । अरु सबै तयारी पूरा भइ सकेको र पालिका अध्यक्ष कडरियालाइ संक्रमण भएको लामो समय सम्म पनि खास स्वास्थ्य समस्या नदेखिएकोले तत्कालै परीक्षण गरी संक्रमणमुक्त भएपछि पालिकाले नीति,कार्यक्रम र बजेट प्रस्तुत गर्ने लिङ्देनले बताउनुभयो । अघिल्लो बर्ष निर्धारित मितिमै बजेट ल्याउनमा ढिलाइ गरेको मिक्वाखोला गाउँपालिकाले बिहीबार(आज) नै बजेट प्रस्तुत गर्ने भएको छ । पालिकाका सवइञ्जिनियर गजेन्द्र थलङले बिहीबारै बजेट आउने बताउनुभयो । दुर्गम र सीमावर्ती क्षेत्र मानिएको फक्ताङलुङ गाउँपालिकाले पनि बिहीबार नीति,कार्यक्रम र बजेट सार्वजनिक गर्ने प्रमुख प्रशासकीय अधिकृत सन्तोष श्रेष्ठले जानकारी दिनुभयो ।