बैधानिक प्रकृयामा आउन फुङलिङका व्यवसायीलाई अनुगमन समितिले दियो असोजभरको समय

ताप्लेजुङ,असोज ६ । संयुक्त बजार अनुगमन समितिले बैधानिक प्रकृयामा आउनबाँकी ताप्लेजुङको फुङलिङका व्यवसायीलाई असोज मसान्तभित्र बैधानिक प्रकृयामा आउन समयसीमा दिएको छ ।

निर्धारित अवधिभित्र व्यवसाय दर्ता,नविकरण,करचुक्ता सहितका कार्य सम्पादन सक्नुपर्ने भन्दै अनुगमन टोलीले असोज मसान्त सम्मको समयसीमा दिएको अनुगमन समिति संयोजक एवम् सहायक प्रमुख जिल्ला अधिकारी टंकबहादुर भट्टराईले जानकारी दिनुभयो । संयुक्त बजार अनुगमन टोलीले पछिल्लो समय कार्ययोजना बनाएर नियमित अनुगमन गरिरहेको छ । अनुगमन समिति सदस्य तथा घरेलु कार्यालय ताप्लेजुङका प्रमुख युवराज घोर्साईका अनुसार सम्वन्धित स्थानीय तह समेतको समन्वयमा जिल्लाका मुख्य बजार क्षेत्रको नियमित अनुगमन गर्न थालिएको हो । खाद्यान्न सहित दैनिक उपभोग्य बस्तु,माछा तथा मासुजन्य पदार्थ,होटल तथा रेष्टुरेन्ट,दुग्द्यजन्य पदार्थ,तरकारी पसल र काष्ठजन्य वन पैदावारमार्फत कच्चा पदार्थ उत्पादन गर्ने भेनियर उद्योग सहितमा अनुगमन गर्न थालिएको अनुगमन समितिले बताएको छ ।

अनुगमन समितिले भेनियर उद्योगले कच्चा पदार्थको उत्पादनका क्रममा खेर जाने पदार्थ व्यवस्थित नगरी खोला तथा नदी छेउ राखेको घटनाप्रति पनि अनुगमन समितिले ध्यानाकर्षण भएको जनाएको छ ।‘हामी त्यसलाई सुक्ष्म ढंगले हेरिरहेका छौं,केहिदिनमै यसका बारेमा निश्कर्षमा पुग्नुपर्ने छ’अनुगमन समिति संयोजक भट्टराईले भन्नुभयो । अनुगमन समितिले दोभान,सुकेटार सहितका बजार पसलहरुको अनुगमन गरिसकेको छ ।