माओवादी केन्द्र ताप्लेजुङद्धारा प्रत्यक्षतर्फका उम्मेदवार घोषणा,नाम आएपनि समानुपातिकतर्फको निर्णय हुन बाँकी

खगेन्द्र अधिकारी
ताप्लेजुङ,भदौ १४ । नेकपा माओवादी केन्द्र ताप्लेजुङले आउँदो मंसिर ४ गते हुने प्रतिनिधि तथा प्रदेशसभा निर्वाचनको लागि प्रत्यक्षतर्फका उम्मेदवारहरुको घोषणा गरेको छ ।

समानुपातिकतर्फका आकाँक्षीहरुको नाम समेत सार्वजनिक गरेपनि समानुपातिकतर्फ भने निर्णय नभएको मंगलवार अपरान्ह आयोजित पत्रकार सम्मेलनमा जानकारी गराइएको छ । माओवादी केन्द्रको जिल्ला समन्वय समिति संयोजक बिष्णुकुमार हाङ्वाङका अनुसार प्रतिनिधिसभामा केन्द्रीय सदस्य खेलप्रसाद बुढाक्षेत्री(पराग),प्रदेश सचिवालय सदस्य लक्ष्मीप्रसाद अन्छङ्वो(आवाज) र मिङ्माडण्डु शेर्पाको नाम सिफारिस गर्ने निर्णय भएको छ । यस्तै प्रदेशसभा १(क)तर्फ खेलप्रसाद बुढाक्षेत्री(पराग) र बमबहादुर भट्टराई(तारा) तथा प्रदेशसभा १(ख)तर्फ लक्ष्मीप्रसाद अन्छङ्वो(आवाज) र मिङ्माडण्डु शेर्पाको नाम सिफारिस गर्ने निर्णय भएको छ ।

प्रतिनिधिसभाको समानुपातिकतर्फ पार्टीका बैकल्पिक केन्द्रीय सदस्य पर्शुराम कार्की,प्रदेश सदस्य तेजशमसेर भट्टराई(काजी) र ठाकुरसिंह साम्सोहाङ,प्रदेश सल्लाहकार देउबहादुर इवाराम र प्रदेश विभागीय सदस्य गोमा चुडाँलको नाम आएको छ । यस्तै प्रदेशसभातर्फ महिलामा बिमला लिम्बू,मनकुमारी मादेन,मलिसा यक्सो र मैया न्यौपाने(सविना)को नाम आएको छ । यस्तै पुरुषतर्फ प्रेमकुमार सेलिङ(संगम),पर्शुराम थोप्रा(बंशु),सागर आङबुहाङ,पूर्ण इजम लिम्बू,मिङ्माडण्डु लामा र अमरनन्द खातिको नाम आएको माओवादी केन्द्रले जनाएको छ ।

माओवादीले मिङ्माडण्डु शेर्पा संयोजक र सागरमणि गौतम सहसंयोजक रहेको संघीय निर्वाचन परिचालन समिति गठन गरेको छ । यस्तै प्रदेशसभा १(क)तर्फ तेजशमसेर भट्टराई(काजी) संयोजक र प्रेमकुमार सेलिङ(संगम) सहसंयोजक रहेको निर्वाचन परिचालन समिति गठन गरेको छ । प्रदेशसभा १(ख)मा बिष्णुकुमार हाङ्वाङ संयोजक र मानबहादुर केसी सहसंयोजक रहेको निर्वाचन परिचालन समिति गठन भएको माओवादीले जनाएको छ । पार्टीका जिल्ला इञ्चार्ज तथा केन्द्रीय सदस्य बुढाक्षेत्रीले पार्टीकातर्फबाट उम्मेदवारको घोषणा भएपनि अहिले गठबन्धनको मर्म र भावना अनुरुप अघि बढ्ने बताउनुभयो ।