ताप्लेजुङको याङ्मा मतदान स्थलमा सबैभन्दा कम ६० जना मतदाता,हाङपाङस्थित सरस्वती मावि मतदानस्थलमा सबैभन्दा बढी

ताप्लेजुङ,चैत १७ । आउँदो स्थानीय तहको निर्वाचनमा ताप्लेजुङमा रहेका ७३ मतदान स्थलमध्ये सबैभन्दा कम मतदाता फक्ताङ्लुङ गाउँपालिकाको वडा नं ७ याङ्मास्थित याङ्मा आधारभूत बिद्यालयमा हुने भएका छन् ।

१ मतदान केन्द्र रहेको त्यहाँ ६० मतदाता हुने जिल्ला निर्वाचन कार्यालयले जनाएको छ । त्यहाँ ३० पुरुष र ३० महिला मतदाता हुने जिल्ला निर्वाचन अधिकारी दिनेश खनालले जानकारी दिनुभयो । त्यसपछिको कम मतदाता सोहि गाउँपालिका वडा नं ६ स्थित ग्याब्ला प्राविमा रहेको मतदान स्थलमा ७० जना र घुन्सा माध्यमिक बिद्यालय मतदानस्थलमा १ सय ६६ जना मतदाता रहेका छन् ।

यस्तै सबैभन्दा बढी मतदाता आठराइ त्रिबेणी गाउँपालिका वडा नं ३ हाङ्पाङस्थित सरस्वती मावि हाङ्पाङ मतदान स्थलमा हुने भएका छन् । ३ मतदान केन्द्र रहने त्यहाँ २ हजार ७ सय १८ मतदाता रहने छन् । त्यसपछि फुङ्लिङ नगरपालिका वडा नं ९ स्थित जनता मावि हाङ्देवा मतदान स्थलमा २ हजार ६ सय ८३ जना मतदाता रहने छन् । त्यहाँ पनि ३ वटा मतदान केन्द्र रहेका छन् । त्यसपछि ३ मतदान केन्द्र रहेको पाथीभरा याङ्वरक गाउँपालिकास्थित कालिका मावि मतदान स्थलमा २ हजार ५ सय ८७ मतदाता रहने भएका छन् ।