घटनाको तथ्य पत्ता नलाएसम्म लास नबुझ्ने

–उज्यालो पोष्ट
ताप्लेजुङ, असोज १० । गएको शुक्रबार ताप्लेजुङको सदरमुकामस्थित फुङ्लिङ नगरपालिका–७ दोखुको निगाले भीरमा फेला परेको पुष्पा तबेबुङ लिम्बूको सव आफन्तले नबुझ्ने भएका छन् । जिल्लाको फक्ताङ्लुङ गाउँपालिका–३ लिङ्खिमकी १८ वर्षीया पुष्पाको हत्या भएको भन्दै घटनाबारे प्रहरी प्रशासनले सत्यतथ्य पत्ता नलगाएसम्म सव जिम्मा नबुझ्ने आफन्तले बताएका हुन् ।
आइतबार बिहान सदरमुकाम फुङ्लिङमा पत्रकार सम्मेलन गर्दै पीडित परिवारले घटनाको तथ्य पत्ता नलगाएसम्म सव नबुझ्ने बताएका हुन् । सम्मेलनमा घटनास्थल तथा घटनाको सबै अवस्थालाई हेर्दा छोरीको हत्या नै भएको पीडित अर्थात बुबा बीरबहादुर लिम्बूले बताउनुभयो । पीडित पक्ष तथा आफन्तको उपस्थिति बिनानै घटना स्थलबाट सव (लास) उठाउनु पनि शंकास्पद भएकोभन्दै घटनाको सत्यतथ्य पत्ता लगाउनेतर्फ प्रहरी प्रशासन अग्रसर नदेखिएको पनि लिम्बूले आरोप लगाउनुभयो । किटानी जाहेरी दिँदासमेत प्रहरीले बेवास्ता गरेकाले घटना अझ रहस्यमय भएको उहाँको भनाइ छ ।
यस्तै मृतककी आमा कविता लिम्बूले पनि छोरीको हत्या नै भएको दावी गर्नुभएको छ । हत्यारा पत्ता नलाएसम्म छोरीको लास जिम्मा नबुझ्ने लिम्बूले बताउनुभयो । छिटोभन्दा छिटो हत्यारा पत्ता लगाएर आफूहरुलाई न्याय दिलाउनुपर्ने उहाँले माग पनि गर्नुभयो । अर्का आफन्त केदारजङ ताप्मादेन लिम्बूले किटानी जाहेरी दिँदासमेत प्रहरीले पक्राउ नगर्नुले पीडित परिवारलाई झनै पीडा भएको बताउनुभयो । किटानी जाहेरी दिइएका व्यक्तिलाई पक्राउ गरेर अनुसन्धान प्रक्रिया अघि बढाउनुपर्नेमा प्रहरी प्रशासन उदासिन बनिदिएकाले घटना थप शंकास्पद र रहस्यमय बनेको उहाँले बताउनुभयो ।
प्रहरी उदासिनताले पीडित परिवारलाई थप पीडा र उत्तेजनामा पु¥याएकाले घटनाको सत्यतथ्य पत्ता नलगाएसम्म आफूहरु लास नबुझ्ने निस्कर्षमा पुगेको पनि लिम्बूले बताउनुभयो । उहाँले घटनाको सत्यतथ्य पत्ता लगाउनमा प्रहरी प्रशासनले अझै तदरुकता नदेखाए आफूहरु आन्दोलित हुने र आजैदेखि आन्दोलन सुरु गर्ने बताउनुभयो । आन्दोलन सुरु भएपनि घटनाका दोषीलाई कानुनी दायरामा नल्याएसम्म नरोकिने र लास पनि नबुझ्ने उहाँले बताउनुभयो ।
घटनालाई सामान्य रुपमा हेरिएकोभन्दै महिनौ दिनसम्म भए पनि आन्दोलित बन्ने र दोषी पत्ता नलगाएसम्म सव नबुझ्ने पीडित परिवारले बताएका छन् । यता घटनाको सत्यतथ्य पत्ता लगाउनमा प्रहरी प्रशासनलाई दबाब दिनका लागि मानवअधिकारकर्मी, सञ्चारकर्मी लगायत सबै पक्षलाई सहयोग गर्न पनि पीडित परिवारले आग्रह गरेको छ ।
प्रहरी प्रशासनले भने घटनाको अनुसन्धान भइरहेको जनाएको छ । चाँडै घटनाको सत्यतथ्य पत्ता लगाउने पनि जिल्ला प्रहरी कार्यालयले जनाएको छ । घटनास्थलमा विषादीको बट्टा भेटिएकाले आत्महत्या भएको हुनसक्नेसमेत प्रहरीको अनुमान छ । सवको पोष्टमार्टम गर्न नपाएकाले पनि घटनाको अनुसन्धानमा केही बाधा पुगिरहेको एक प्रहरी कर्मचारीको भनाइ छ ।
मृतक पुष्पा सदरमुकाम फुङ्लिङ बजारको बिहीबारे टोलमा डेरा बसेर भानुजन माध्यमिक विद्यालय कक्षा ११ मा अध्ययनरत रहनुभएको थियो । डेरा बसेको क्षेत्र बिहीबारेदेखि करिव आधा घण्टाको दूरीमा उहाँको सव भेटिएको थियो । सव शुक्रबारदेखि ताप्लेजुङ जिल्ला अस्पतालको सव गृहमा राखिएको छ ।