मौवाटारमा सुख्खा बन्दरगाह निर्माणको पैरवीमा ताप्लेजुङको फक्ताङलुङका वडाध्यक्ष,डिपीआरका लागि सरकार प्रतिबद्ध

खगेन्द्र अधिकारी
ताप्लेजुङ,चैत २३ । सरकारले ताप्लेजुङको फक्ताङलुङ गाउँपालिका वडा नं ७ स्थित मौवाटारमा सुख्खा बन्दरगाह निर्माणका लागि बिस्तृत परियोजना प्रतिबेदन(डिपिआर)तयार गर्ने बिषय प्राथमिकतामा राख्ने प्रतिबद्धता जनाएको छ ।

नेपाल सरकारका उद्योग,बाणिज्य तथा आपुर्ति मन्त्री दामोदर भण्डारीले मौवाटारमा सुख्खा बन्दरगाह निर्माणका लागि आगामी आर्थिक बर्षको नीति,कार्यक्रम तथा बजेटमा प्राथमिकताका साथ समेट्न मन्त्रालयका सचिवलाई निर्देशन दिनु भएको छ ।

प्रतिनिधिसभा सदस्य योगेशकुमार भट्टराईका साथ मन्त्री भण्डारीलाई भेट्नु भएका फक्ताङलुङ गाउँपालिका वडा नं ७ ओलाङचुङगोलाका वडाध्यक्ष छेतेन लामा शेर्पाले मन्त्री भण्डारीले मौवाटारमा सुख्खा बन्दरगाह निर्माणका लागि आगामी आवको नीति,कार्यक्रम तथा बजेटमा प्राथमिकताका साथ समेट्ने प्रतिबद्धता जनाएको जानकारी दिनुभयो ।

वडाध्यक्ष शेर्पा चैत लागेयता यता संघीय राजधानीमा बसेर सुख्खा बन्दरगाह निर्माण,ओलाङचुगोलामा मुल भन्सार कार्यालय सञ्चालन,तमोर करिडोर(टिपताला–ओलाङचुङगोला–फुङलिङ सडकखण्ड)स्तरोन्नती सहितका विकास निर्माणका कार्यमा निरन्तर पैरवी गरिरहनु भएको छ ।

मौवाटारमा सुख्खा बन्दरगाह निर्माणका लागि नेपाल सरकारको उद्योग मन्त्रालयले गम्भिर चासो राखेको र आगामी आवको नीति,कार्यक्रम तथा बजेटमा उक्त बिषयलाई प्राथमिकताकासाथ समेट्ने प्रतिबद्धता समेत व्यक्त गरेको वडाध्यक्ष शेर्पाले जानकारी दिनुभयो । मौवाटारमा सुख्खा बन्दरगाह निर्माणका लागि सरकारले यसअघि नै सम्भाव्यता अध्ययन गरिसकेको छ ।

चीनको स्वशासित क्षेत्र तिब्बतले यसअघि नै आफ्नो क्षेत्रमा सुख्खा बन्दरगाह निर्माणको कार्य पूरा गरिसकेको अवस्थामा नेपाली पक्षबाट पनि मौवाटारमा सुख्खा बन्दरगाह निर्माण गर्नु अनिवार्य रहेको वडाध्यक्ष शेर्पाको भनाई छ । तमोर करिडोर अन्र्तगत नेपाल–तिब्बत सीमा नाका टिपताला सम्म सडकको ट्रयाक ओपन भई सवारी साधन समेत सञ्चालन भइरहेको र यो सडक खण्डमा स्तरोन्नतीको काम समेत हुने अवस्थामा मौवाटारमा सुख्खा बन्दरगाह निर्माण अनिवार्य रहेको वडाध्यक्ष शेर्पाले बतानुभयो ।

सम्भाव्यता अध्ययनका क्रममा समेत मौवाटारमा सुख्खा बन्दरगाह निर्माण गर्न उपयुक्त हुने देखिएकोले त्यसको डिपीआर तयार गरी तत्काल बन्दरगाह निर्माण गर्नुपर्ने वडाध्यक्ष शेर्पाको भनाई रहेको छ । तमोर करिडोरले नेपाल–चीन र भारतका बजारलाई जोड्ने र यो सडक नेपालकै सबैभन्दा नजिकको त्रिदेशीय सीमा भएकोले सुख्खा बन्दरगाह निर्माण गर्नुपर्ने माग शेर्पाले राख्दै आउनु भएको छ । सशस्त्र प्रहरीको सीमा सुरक्षा बल(बिओपी)को भवन समेत मौवाटारमा निर्माण भइसकेको छ ।

वडाध्यक्ष शेर्पाले भन्सार विभागलाई ओलाङचुङगोलामा मुल भन्सार कार्यालय सञ्चालनका लागि समेत अनुरोध गर्नु भएको छ । उहाँका अनुसार कोभिडका कारण बन्द भएको भन्सार कार्यालय गोलामा अहिले सम्म सञ्चालनमा छैन । चीनको स्वशासित क्षेत्र तिब्बत सरकारले अध्यागमन प्रहरी सहित ड्राईपोट समेत सञ्चालन गरिसकेको र नेपाल–तिब्बत क्षेत्रमा सामान आयात निर्यात समेत हुने भएकोले मुल भन्सार कार्यालय पुनः सञ्चालन गर्नु अनिवार्य रहेको वडाध्यक्ष शेर्पाले बताउनु भएको छ ।