सिकाईमैत्री बिद्यालय निर्माण गर्न मैवाखोलामा सिकाईमैत्री कार्यशाला सुरु,चैत २७ मा सीपमा आधारित सिकाई मेला हुने

खगेन्द्र अधिकारी
ताप्लेजुङ,चैत २१ । गुणस्तरीय शिक्षाका लागि सिकाईमैत्री बिद्यालयहरु निर्माण गर्ने उद्धेश्यले ताप्लेजुङको मैवाखोला गाउँपालिकाले आधारभूत तहका बिद्यालयका शिक्षकहरुका लागि ५ दिने सिकाईमैत्री कार्यशाला सुरु गरेको छ ।

सार्वजनिक शिक्षा सुधारको अभियानमा सक्रिय रुपमा लागिरहेको मैवाखोलाले बिहीबारबाट गाउँपालिका भित्र कार्यरत कक्षा १ देखि ८ सम्मका बिषय शिक्षकहरुका लागि उक्त कार्यशाला सुरु गरेको पालिका अध्यक्ष विजयप्रकाश वनेमले जानकारी दिनुभयो । कार्यशालाको समापन पछि आउँदो चैत २७ गते पालिकाले पालिका क्षेत्रका आम अभिभावक,शिक्षक,बुद्धिजीवी र बिद्यार्थीहरुको उपस्थितिमा सीपमा आधारित सिकाई मेलाको समेत आयोजना गर्ने पालिकाको सामाजिक विकास समितिमा संयोजक एवम् मैवाखोला गाउँपालिका वडा नं १ का वडाध्यक्ष चन्द्रकुमार तामाङले जानकारी दिनुभयो ।

सिकाईमैत्री कार्यशालाको सहजीकरण बिषय विज्ञ अर्जुन भट्ट, बृहत् राष्ट्रिय शिक्षा अभियान नेपालका संयोजक अभिषेक घिमिरे र कमला देवकोटाले गर्नुहुने भएको छ । कार्यशालाको पालिका अध्यक्ष वनेमले शुभारम्भ गर्नु भएको छ । कार्यशाला चैत २५ सम्म सञ्चालन हुने भएको छ । यसअघि मैवाखोलाले मन्टेश्वरी कक्षाका शिक्षकहरुलाई समेत कार्यशाला गराई सकेको छ ।

सार्वजनिक शिक्षा सुधार नभई पालिकाको शैक्षिक विकास र उन्नयन सम्भव नहुने ठम्याएको मैवाखोला गाउँपालिकाले अघिल्लो बर्षको जेठ दोस्रो साता वृहत्त शैक्षिक सम्मेलन गर्दै शैक्षिक सुधारका लागि संकल्प प्रस्ताव र घोषणा पत्र समेत जारी गरी कार्यान्वयन गर्दै आइरहेको छ । उसले अभिभावक सचेतना कार्यक्रम समेत सञ्चालन गरिरहेको छ ।

बाल तथा बिद्यार्थीमैत्री सिकाई,पाठ्य सामग्री सहितको कक्षा,पढाईप्रतिको जागरुकता सृजना,बिद्यार्थीको नियमितता र बिद्यालयमा अभिभावकको शैक्षिक दायित्व सृजना गर्न मैवाखोलाले बिभिन्न रणनीति समेत बुनिरहेको जनाएको छ ।