फुङलिङका प्रत्येक वडामा महिलाको नेतृत्व तथा क्षमता विकास अभिमुखीकरण सुरु

उज्यालो पोष्ट
ताप्लेजुङ,चैत ७ । ताप्लेजुङको फुङलिङ नगरपालिकाले प्रत्येक वडामा महिलाको नेतृत्व तथा क्षमता विकास,महिला प्रजनन् स्वास्थ्य,आय आर्जन र न्याय तथा कानुन सम्वन्धी अभिमूखीकरण कार्यक्रम सुरु गरेको छ ।

नगरपालिकाको चालू आर्थिक बर्षको बार्षिक स्वीकृत कार्यक्रम अनुसार लैंगिक समानता तथा सामाजिक समावेशीकरण कार्यक्रममार्फत उक्त अभियान सुरु भएको फुङलिङ नगरपालिकाका नगर उपप्रमुख भीमादेवी ओझाले जानकारी दिनुभयो । कार्यक्रम अन्तरगत प्रत्येक वडामा नेतृत्व तथा क्षमता विकास,उद्घोषण तथा भाषणकला,आमा तथा शिशुका लागि औषधि तथा तागतिलो आहरविहार सम्वन्धी ज्ञान तथा भान्छामा आयुर्वेदिक जडिबुटी उपयोग गर्ने तौढ तरिका,लैंगिक हिंसा बिरुद्धको कानुन जानकारी संगै महिला सवाल र नीतिगत व्यवस्था अन्तरगत मुलुकी फौजदारी तथा मुलुकी देवानी संहिता,सुरक्षित मातृत्व तथा प्रजनन् स्वास्थ्य अधिकारका सवाल केन्द्रित बिषयमा वडा तहका नागरिकलाई अभिमुखीकरण गरिने नगरपालिकाका प्रशासकीय अधिकृत प्रकाश तामाङले जानकारी दिनुभयो ।

अभिमुखीकरण कार्यक्रममा स्थानीय उपलब्ध सम्वन्धित क्षेत्रका विज्ञ तथा जानकारहरुलाई सहजीकरण गर्ने अवसर प्रदान भएको समेत नगरपालिकाले जनाएको छ । फुङलिङ नगरपालिका वडा नं ७ बाट अभिमुखीकरण सुरु भएको छ । अभिमुखीकरण अन्तरगत बुधवार जिल्ला आयुर्वेद स्वास्थ्य केन्द्र ताप्लेजुङका प्रमुख डाक्टर गम्भिर झा र पत्रकार महासंघ ताप्लेजुङका पूर्व अध्यक्ष खगेन्द्र अधिकारीले सहजीकरण गर्नु भएको कार्यक्रम संयोजक सीता गुरुङले जानकारी दिनुभयो । उद्घाटन सत्रमा फुङलिङ नगरपालिका वडा नं ७ का वडाध्यक्ष योगेन्द्र निरौला सहित वडाका जनप्रतिनिधिहरुको सहभागिता रहेको थियो ।