नेत्र ज्योति संघको रजत महोत्सवमा प्रभातफेरी

उज्यालो पोष्ट
ताप्लेजुङ, पुस ८ । ताप्लेजुङस्थित नेपाल नेत्र ज्योति संघको रजत महोत्सवको अवसरमा आइतबार बिहान प्रभातफेरी गरिएको छ । संघ तथा संघद्वारा सञ्चालित डिचेन डोङ्गला स्मारक आँखा उपचार केन्द्रको २५ औं स्थापना दिवस अर्थात रजत महोत्सवको अवसरमा सदरमुकाम फुङ्लिङमा प्रभातफेरी गरिएको हो ।
स्थापना दिवस अर्थात रजत महोत्सव मनाउन तीन दिने कार्यक्रम आयोजना गरिएको र कार्यक्रमको पहिलो दिन आइतबार आँखा सचेतनासम्बन्धी प्रभातफेरी गरिएको नेपाल नेत्रज्योति संघ ताप्लेजुङका उपसभाति खगेन्द्र अधिकारीले जानकारी दिनुभयो । प्रभातफेरी फुङ्लिङ बजारको तोक्मेडाँडाबाट सुरु भई नगर परिक्रमा पछि डिचेन डोङ्गला स्मारक आँखा उपचार केन्द्रमा पुगेर समापन गरिएको छ ।
उपसभापति अधिकारीका अनुसार रजत महोत्सवको दोस्रो दिन सोमबार औपचारिक कार्यक्रम हुने छ । नेत्र ज्योति संघले प्रकाशन गरेको ‘ज्योति स्मारिका २०८०’ को बिमोचन, शुभकामना आदान–प्रदान, सम्मान तथा प्रशंसापत्र र कदरपत्र वितरण, साँस्कृतिक कार्यक्रम लगायतका गतिविधि हुने उहाँले जानकारी दिनुभयो ।
नेत्र ज्योति संघ ताप्लेजुङको रजत महोत्सवकै कार्यक्रमअन्तर्गत मंगलबार फुङ्लिङमा नेपाल नेत्र ज्योति संघ, कोशी प्रदेश समितिको दोस्रो अधिवेशनसमेत हुने संघका जिल्ला सभापति राजकुमार गुरुङले जानकारी दिनुभयो । मानव स्वास्थ्यअन्तर्गत आँखाको क्षेत्रमा काम गरिरहेको संस्था नेपाल नेत्र ज्योति संघको ताप्लेजुङ शाखा २०५५ सालमा स्थापना भएको हो ।
यता प्रभातफेरी कार्यक्रममा संघका केन्द्रीय अध्यक्ष डा. चेतराज पन्त, जिल्ला समन्वय समिति प्रमुख छिरिङ लामा, फुङ्लिङ नगरपालिकाका प्रमुख अमिर मादेन, प्रमुख जिल्ला अधिकारी हीरादेवी पौडेल सहभागी हुनुभयो । त्यस्तै जिल्लास्थित सुरक्षा निकायका प्रमुख, सरकारी तथा गैरसरकारी कार्यालय, सामाजिक संघ/संस्थाका प्रमुख तथा प्रतिनिधि लगायतको प्रभातफेरीमा सहभागिता रहेको थियो ।