मैवाखोलाले आर्थिक ऐनमार्फत तोक्यो जग्गाको मूल्य

खगेन्द्र अधिकारी
ताप्लेजुङ,भदौ १८ । ताप्लेजुङको मैवाखोला गाउँपालिकाले आर्थिक ऐनमार्फत चालु आर्थिक बर्षका लागि पालिका क्षेत्रका जग्गाहरुको मूल्याङ्कन दर निर्धारण गरेको छ ।

पालिकाले आर्थिक ऐनमार्फत साँघुपार्टी बजारदेखि आसिकेटारसम्म, साँघुपार्टी बजारदेखि पूर्वमा गोतामेडाँडाँसम्म,उत्तरमा नमूना माविको भवन,बत्तिसे देखि भट्टराई गाउँसम्म,साँघुपाटी बजार देखि टाउकेटार रंगशाला हुँदै गोतामेडाँडासम्मका बिक्री हुने जग्गाको मूल्य प्रतिरोपनी ८ लाख रुपैयाँ निर्धारण गरिएको छ । सहायक बजार क्षेत्र आशिकेटार देखि लुकुवा क्षेत्रमा सडकको दायाँबायाँ रहेका तीनसय मिटरसम्मका घडेरी बिक्री हुने जग्गाको मूल्य प्रतिरोपनी ६ लाख निर्धारण गरिएको छ । वडा नं २ तेम्बे क्षेत्रको पोक्ला खेमबहादुर वनेमको घरसम्म पूर्व,प्राथमिक स्वास्थ्य केन्द्र झनलाल तेम्बेको खेत आसपास दक्षिण,गणेश तेम्बेको घर पश्चिम,प्रहरी चौकी हुँदै प्राथमिक स्वास्थ्य केन्द्रसम्म र उत्तरमा खगेन्द्र वनेमको घर आसपासका घडेरीको मूल्य प्रतिरोपनाी ४ लाख रुपैयाँ हुने पालिकाले आर्थिक ऐनमार्फत उल्लेख गरेको छ ।

मैवाखोला गाउँपालिका वडा नं १ को क्षेत्र अन्तरगत तेल्लाबुङ बजार क्षेत्रको पूर्वमा जनकल्याण मावि,पश्चिममा बाघधारा,उत्तरमा रुद्रकुमारको खेत र दक्षिणमा सलबहादुर तामाङको घरसम्मका घडेरीको मूल्य प्रतिरोपनी ४ लाख रुपैयाँ निर्धारण गरिएको छ । वडा नं १ कै वडा कार्यालय क्षेत्रको पूर्व सेलुवाखोला,पश्चिममा पिपलचौक,उत्तरमा गैरी गाउँको तेर्सो बाटो र दक्षिणमा कुलबहादुर तामाङको घर आसपासका घडेरीयोग्य जमिनको मूल्य प्रतिरोपनी २ लाख २० हजार रुपैयाँ निर्धारण गरिएको छ । यस्तै पूर्वमा साक्फारा क्षेत्रको सेलुवाखोला,पश्चिममा जैयाखोला,दक्षिणमा प्रेम तेम्बेको घर आसपास र उत्तरमा कारवारी कान्छाको घर आसपासका घडेरीयोग्य जमिनको मूल्य प्रतिरोपनी १ लाख ६५ हजार रुपैयाँ निर्धारण गरिएको छ । व

डा नं १ कै फट्याङ्ग्रे क्षेत्रको पूर्वमा श्याम मास्वाको घर,पश्चिममा उदय लिम्बूको घर,उत्तरमा अग्नि लिम्बूको घर र दक्षिणमा राजेश मास्वाको घर आसपास तथा सुन्तले आसपासको घडेरीको रुपमा बिक्री हुने जग्गाको मूल्य समेत प्रतिरोपनी १ लाख ६५ हजार रुपैयाँ निर्धारण गरिएको छ । वडा नं २ अन्तरगत वडा कार्यालय क्षेत्रको पश्चिम कविर वनेमको घर,उत्तरमा पदम मुसुहाङको घर,दक्षिणमा सिंहराज मनरानी ओट्ने आधारभूत बिद्यालय र पूर्वमा कविर वनेमको घर तथा टारी खोल्सा आसपासको घडेरीजन्य जमिनको प्रतिरोपनी ३ लाख ३० हजार रुपैयाँ मूल्य निर्धारण गरिएको छ । वडा नं ३ अन्तरगत मानेडाँडा गुम्बा,मानेडाँडा भ्यूटावर आसपासको घडेरीमा बिक्री हुने जग्गाको मूल्य प्रतिरोपनी २ लाख २० हजार रुपैयाँ निर्धारण गरिएको छ ।

वडा नं ४ को वडा कार्यालय क्षेत्रको दक्षिणमा देवी खोल्सा,पश्चिममा गंगा आधारभूत बिद्यालय खरबारी टोल आसपास,उत्तरमा नन्द श्रेङको घर र पूर्वमा हिमा भट्टराईको घर आसपासको घडेरीमा बिक्री हुने जग्गाको मूल्य प्रतिरोपनी २ लाख रुपैयाँ निर्धारण गरिएको छ । मैवाखोला वडा नं ५ मा वडा कार्यालय क्षेत्रको पूर्वमा पार्टीडाँडा मावि,पश्चिममा शाहजीत आधारभूत बिद्यालय,उत्तरमा लाम्बसेम्बादेखि केशर वनेमको घर आसपास र दक्षिणमा कुलप्रसाद लिम्बूको घर आसपासका घडेरीयोग्य जमिनको मूल्य प्रतिरोपनी १ लाख ६५ हजार रुपैयाँ मूल्य हुनेगरी निर्धारण गरिएको छ ।

वडा नं ६ अन्तरगत ६ नं वडा कार्यालय क्षेत्रको पश्चिम दानाबुङ खोर्पेखोला जिडब्लुटी खानेपानी मुहान हुँदै नरबहादुर लिम्बूको घर,उत्तरमा गंगाबहादुर र हर्कबहादुर लिम्बूको घर,पूर्वमा सुरवीर र अजय लिम्बूको घर र दक्षिणमा कुलबहादुर लिम्बूको घर आसपासका घडेरी योग्य जमिनको मूल्य प्रतिरोपनी २ लाख २० हजार रुपैयाँ निर्धारण गरिएको छ ।

पालिकाका ६ वटै वडाहरुमा सञ्चालन हुने ठूला आयोजनाहरु,घडेरी भन्दा बाहेकका सबै क्षेत्रहरु,खानेपानी तथा जलविद्युत आयोजनाहरु र राष्ट्रिय प्रसारण लाइनले प्रभावित हुने क्षेत्रहरुको जग्गाको मूल्य प्रतिरोपनी ३ लाख रुपैयाँ हुने पालिकाले आर्थिक ऐनमार्फत मूल्य निर्धारण गरेको छ । पालिकाका अन्य ग्रामीण क्षेत्रहरुमा अलैंची बारी उल्लेख भएका जग्गाहरु प्रतिरोपनी १ लाख,फलफूल खेति भएकाहरु प्रतिरोपनी ५० हजार,धनहर खेत प्रतिरोपनी ४० हजार,पाखाबारी प्रतिरोपनी ३० हजार,जंगल प्रतिरोपनी न्यूनतम् २० हजार र पाखा,पखेरा र भीर पहराहरु भएको क्षेत्रको जग्गा प्रतिरोपनी न्यूनतम् १५ हजार रुपैयाँ निर्धारण गरिएको छ ।