ताप्लेजुङमा सामुदायिक कुकुर बन्ध्याकरण तथा रेबिज बिरुद्धको खोप अभियान सञ्चालन

खगेन्द्र अधिकारी
ताप्लेजुङ,फागुन १७ । भेटनरी अस्पताल तथा पशु सेवा विज्ञ केन्द्र ताप्लेजुङले निःशुल्क रुपमा सामुदायिक कुकुर बन्ध्याकरण तथा रेबिज बिरुद्धको खोप सञ्चालन गरेको छ ।

नेपाल एग्री लाइभस्टक ट्रेनिङ एण्ड रिसर्च सेन्टर इटहरीको प्राविधिक सहयोगमा फागुन १६ देखि १८ गते सम्मको तीनदिने शिविर सञ्चालन भइरहेको हो । भेटनरी अस्पताल तथा पशु सेवा विज्ञ केन्द्र ताप्लेजुङका प्रमुख डाक्टर रोशन दाहालका अनुसार करिव १ सय ८० देखि २ सय सम्म कुकुरको बन्ध्याकरण गर्ने योजना रहेको छ । करिव एकसय सामुदायिक कुकुर भेला भइसकेको र उनीहरुलाई शनिवारसम्ममा बन्ध्याकरण तथा रेबिज बिरुद्धको खोप दिइने समेत दाहालले जानकारी दिनुभयो । उहाँका अनुसार प्राविधिकको टोलीले स्थलगत रुपमै गएर सामुदायिक कुकुरको खोजी गरी भेटनरी अस्पताल तथा पशु सेवा विज्ञ केन्द्र ताप्लेजुङ परिसरमा केन्द्रित गरी बन्ध्याकरण तथा रेविज बिरुद्धको खोप दिने छ ।

रेबिज एक प्रकारको जनावरको टोकाइबाट सर्ने भाइरजन्य संक्रमण हो । यदि रेबिज लागेको जनावरले टोकेमा यस विरुद्ध खोप नलगाएमा रेबिज संक्रमण जनावरबाट मानिसमा सर्न सक्छ । यो रोग लागिसकेपछि निको हुन असम्भव छ । सामान्यतया तातो रगत भएको र स्तनधारी जनावरको टोकाइबाट रेबिज लाग्न सक्छ । तर,जनावरको टोकाइबाट मृत्यु हुनेको तथ्यांक केलाउँदा सबैभन्दा बढी कुकुरको टोकाइबाट रेबिज संक्रमण भएको पाइन्छ । तर घोडा, खरायो, मुसाले टोकेको खण्डमा रेबिज विरुद्ध खोप दिइँदैन । नेपाल सरकारकै मापदण्डमा पनि यी जनावरले टोकेमा रेबिजको जोखिम नहुने हुँदा रेबिज लगाउन नपर्ने उल्लेख छ । तर विगतमा ती जनावरहरूमा पहिला शंकास्पद बहुला कुकुर वा बहुला जनावरले टोकेको छ भने रेबिज विरुद्ध खोप लगाउन आवश्यक रहेको पशु स्वास्थ्य क्षेत्रमा काम गर्ने विज्ञहरु बताउँछन् ।