‘एक वडा,एक कार्यक्रम सहितको सहभागिता’नारा दिएर आठराई त्रिबेणीले ११५ औं नारी दिवस मनाउँदै

खगेन्द्र अधिकारी
ताप्लेजुङ,फागुन १३ । ताप्लेजुङको आठराई त्रिबेणी गाउँपालिकाले बक्तृत्वकला,चेतानमुलक नाटक,नृत्य र उत्पादित घरेलु सामग्री प्रर्दशनी सहितका कार्यक्रम गरेर यसबर्षको नारी दिवस मनाउने भएको छ ।

यही फागुन २४ गते ११५ औं अन्तराष्ट्रिय नारी दिवस मनाईदैं छ । पालिकाले ‘एक वडा,एक कार्यक्रम सहितको सहभागिता’नारा तय गरेर ११५ औं अन्तराष्ट्रिय नारी दिवस मनाउने तयारी गरेको पालिकाका निमित्त प्रमुख प्रशासकीय अधिकृत लीलाराज खड्काले जानकारी दिनुभयो । आठराई त्रिबेणी गाउँपालिकामा ५ वटा वडा रहेका छन् ।

निमित्त प्रमुख प्रशासकीय अधिकृत खड्काका अनुसार ‘समान कालको असमान ज्याला’शीर्षकमा हुने वक्तृत्वकला प्रतियोगितामा प्रत्येक वडा भित्रका तीनवटा समूहबाट एक–एकजनाका दरले प्रस्तुति दिन पाउने भएका छन् । प्रत्येक वडाभित्रका ४ वटा समूहबाट लैंगिक सशक्तिकरणसंग सम्वन्धी चेतनामूलक नाटक प्रस्तुतिको कार्यक्रम समेत राखिएको छ । प्रतियोगात्मक सडक नाटकका लागि बढीमा २० मिनेटको समय दिइने पालिकाले जनाएको छ ।

लैंगिक सशक्तिकरणसंग सम्वन्धित रहेर प्रस्तुत गरिने नृत्यमा वडा भित्रका तीनवटा समूहबाट एक–एकवटा नृत्य प्रस्तुति गर्न पाउनेगरी कार्यक्रम तय गरिएको आठराई त्रिबेणी गाउँपालिकाको महिला तथा बालबालिका शाखा प्रमुख सीता आङबुहाङले जानकारी दिनुभयो । उहाँका अनुसार लैंगिक समावेशीकरण तथा सशक्तिकरणसंग सम्वन्धित प्रतिश्प्रधात्मक लोक दोहोरी तथा कविता बाचन प्रतियोगिता समेत सञ्चालन हुने छ । लोक दोहोरीका लागि लय आफैंले छनौट गरी महिला र पुरुषको समान सहभागितामा कार्यक्रम सञ्चालन हुने छ ।

पालिकाले प्रत्येक बिधामा नियमानुसार सहभागी हुने प्रत्येक वडाका ४–४ वटा समूहलाई जनही ५–५ हजार रुपैयाँका दरले यातायात खर्च उपलब्ध गराउने भएको छ । यस्तै उद्यमशीलता,सीप प्रवद्र्धन कार्यक्रम अन्तरगत घरेलु उत्पादन सामग्रीहरु झोला,ढाकाको टोपी,सारी,बाँसद्धारा निर्मित मुढा,ढाकी,सजावटका अन्य सामग्री,सिलाम साक्मालाई प्रर्दशनी कक्षमा राखिने भएको छ । प्रतिश्पर्धात्मक मानिएको उक्त सामग्री प्रर्दशनीका क्रममा प्रथम हुनेलाई ५ हजार,द्धितीय हुनेलाई ३ हजार तृतीय हुनेलाई २ हजार रुपैयाँ प्रोत्साहन रकम प्रदान गरिने समेत पालिकाले जनाएको छ ।