पाथीभरा याङवरकद्धारा नवदम्पतीलाई स्वास्थ्य सन्देशले भरिएको शुभकामना कार्ड प्रदान

उज्यालो पोष्ट
ताप्लेजुङ,फागुन ११ । ताप्लेजुङको पाथीभरा याङवरक गाउँपालिकाले नवदम्पतीलाई अनिवार्य प्रदान गर्नुपर्ने शुभकामना कार्ड प्रदान गर्न थालेको छ ।

कोशी प्रदेशका पूर्वमन्त्री वलबहादुर साम्सोहाङ दम्पतिलाई पालिका अध्यक्ष केशरकुमार सुब्बाको उपस्थितिमा पालिका उपाध्यक्ष रनमाया गुरुङले अनिवार्य प्रदान गर्नुपर्ने शुभकामना कार्ड प्रदान गर्नु भएको छ । पत्नी वियोगमा रहनु भएका साम्सोहाङ यसैसाता पाथीभरा याङ्वरक गाउँपालिका वडा नं १ नाङखोल्याङस्थित कालिका माविका शिक्षक माया तामाङसंग बैबाहिक जीवनमा बाँधिनु भएको छ । साम्सोहाङको गृह गाउँ पाथीभरा याङ्वरक गाउँपालिका वडा नं ५ चाक्सिबोटेमा पुगेर पाथीभरा याङ्वरक गाउँपालिकाले नवदम्पतीलाई अनिवार्य प्रदान गर्नुपर्ने शुभकामना कार्ड प्रदान गरेको पालिका अध्यक्ष सुब्बाले जानकारी दिनुभयो । नवदम्पतीलाई अनिवार्य प्रदान गर्नुपर्ने शुभकामना कार्डमा विवाहित जोडीलाई दाम्पत्य जीवन स्वास्थ्य, सुखमय र उज्ज्वल बनाउनमा सहयोग पुग्ने स्वास्थ्य सन्देशहरु समावेश गरिएको पालिका अध्यक्ष सुब्बाले जानकारी दिनुभयो ।

पाथीभरा याङ्वरक गाउँपालिकाले वैवाहिक सम्बन्ध सुरुवात गरेका दम्पत्तिलाई स्वास्थ्य सन्देशहरु समावेश रहेको कार्ड प्रदान गर्दै आइरहेको छ । पालिका अध्यक्ष सुब्बाका अनुसार नवविवाहित जोडीलाई प्रदान गरिएको शुभकामना कार्डमा प्रजनन स्वास्थ्य,जन्मजात अपाङ्गता रोकथाम लगायतमा अपनाउनुपर्ने सावधानी र तरिकाजस्ता स्वास्थ्य सन्देश छन् । सन्देशमूलक स्वास्थ्यसम्बन्धी जानकारी भएको शुभकामना कार्डले नवविवाहित जोडीको भविष्य सुखमय बनाउनमा सहयोग पुग्ने विश्वास राखिएको पालिका अध्यक्ष सुब्बाले बताउनुभयो ।

‘हामी हाम्रा नागरिकहरुलाई स्वस्थ्य,सुखी र समृद्ध बनाउन चाहन्छौं । नागरिकहरु स्वस्थ भए मात्र मुलुक समृद्ध बन्छ भन्ने हाम्रो मान्यता हो । यो कार्डमा नवजोडिले विवाहपछि गर्नुपर्ने योजनाहरुको बारेमा,पारिवारिक सुख,समृद्धि र स्वस्थ्य सन्तानको योजनाको बारेमा उल्लेख गरिएको हुन्छ’पालिका अध्यक्ष सुब्बाले भन्नुभयो । शुभकामना कार्डको अध्ययन र कार्डमा लेखिएका कार्यको प्रभावकारी कार्यान्वयनले जन्मदोष र जन्मदै अपांगता हुने जोखिम प्रायः शुन्य हुने पालिका अध्यक्ष सुब्बाको भनाई छ । यसअघि मैवाखोला गाउँपालिका वडा नं १ मा पनि नव विवाहित जोडीलाई सन्देशमूलक सूचनाले भरिएको यस्तो कार्य प्रदान गरिदैं आएको छ ।

Similar Posts