राष्ट्रपति रनिङ शिल्डमा सहभागी विद्यार्थीको विदाई

-उज्यालो पोष्ट
ताप्लेजुङ, फागुन १ । ताप्लेजुङको मैवाखोला गाउँपालिकाले जिल्लास्तरीय राष्ट्रपति रनिङ शिल्ड प्रतियोगितामा सहभागी भएका विद्यार्थी (खेलाडी) लाई विदाई गरेको छ । गाउँपालिकाले प्रतियोगितामा सहभागी भएर विभिन्न विधामा विभिन्न पदक जित्न सफल विद्यार्थीलाई सम्मानसहित विदाई गरेको हो ।
गाउँपालिकाका प्रवक्ता एवम् वडा १ ढुङ्गेसाँघुका वडाध्यक्ष चन्द्रकुमार तामाङका अनुसार बिहीबार एक कार्यक्रमको आयोजना गरी प्रतियोगितामा विभिन्न पदक जित्न सफल विद्यार्थीको विदाई गरिएको हो । प्रतियोगिताका विजेता विद्यार्थीहरुलाई गाउँपालिका अध्यक्ष विजयप्रकाश वनेम लगायतका पदाधिकारीले सम्मानसहित विदाई गर्नुभएको प्रवक्ता तामाङले जानकारी दिनुभयो ।
बुधबार सम्पन्न भएको १५ औं जिल्लास्तरीय राष्ट्रपति रनिङ शिल्ड प्रतियोगितामा २५ स्वर्णसहित मैवाखोला गाउँपालिका प्रथम भएको थियो । रजत र कास्यमा समान १८–१८ पदकमा जित निकालेको थियो । गाउँपालिका प्रवक्ता तामाङका अनुसार मैवाखोलाले सबैभन्दा बढी उसु विधामा आठ वटा स्वर्ण, एथलेटिक्सतर्फ छ र कराँतेमा पाँच स्वर्ण जितेको छ । यस्तै तेक्वान्दोमा चार र छात्रा भलिबल तथा छात्रा कबड्डीमा एक–एक स्वर्ण जितेको थियो ।
प्रतियोगितामा स्वर्ण पदक विजेतालाई जनही पाँच हजार रुपियाँ, रजतलाई एक हजार र कास्य पदक विजेतालाई जनही ५०० रुपियाँ पुरस्कार रकम प्रदान गरी विद्यार्थीलाई गरिएको प्रवक्ता तामाङले जानकारी दिनुभयो । उहाँका अनुसार प्रतियोगितामा गाउँपालिकाभित्रका पाँच वटा माध्यमिक विद्यालयका विद्यार्थी सहभागी भएका थिए ।
जिल्ला खेलकुद विकास समिति ताप्लेजुङको आयोजनामा भएको प्रतियोगितामा मैवाखोलासहित जिल्लाका नौवटै स्थानीय तहले सहभागिता जनाएका थिए । मैवाखोला गाउँपालिकाकै प्रशासकीय केन्द्र रहेको साँघुस्थित नारायणी माध्यमिक विद्यालयको खेल मैदानमा प्रतियोगिता गएको आइतबार सुरु भई बुधबार सम्पन्न भएको हो ।