बिद्यालय स्तरीय महिला फुटबल सहितका कार्यक्रम गरेर बार्षिक उत्सव मनाउँदै साङक देछ्योलिङ
उज्यालो पोष्ट
ताप्लेजुङ,कात्तिक २९ । ताप्लेजुङको फुङलिङ नगरपालिका वडा नं ९ स्थित साङक देछ्योलिङ गोन्पा विद्यालयले आफ्नो बार्षिक उत्सवको अवसरमा फुङलिङ नगरस्तरीय अन्तर मावि महिला फुटबल प्रतियोगिता सहितका कार्यक्रम सञ्चालन गर्ने भएको छ ।
नगरपालिकाका सामुदायिक,संस्थागत र धार्मिक बिद्यालयहरुका १६ बर्ष मुनिका महिला खेलाडीले प्रतियोगितामा सहभागिता जनाउन पाउने बिद्यालय व्यवस्थापन समिति अध्यक्ष दावा शेर्पाले जानकारी दिनुभयो । प्रतियोगिताका लागि जिल्ला फुटबल संघले प्राविधिक सहयोग गर्ने भएको छ ।
बिद्यालयका प्रधानाध्यापक पासाङरिता शेर्पाका अनुसार बार्षिक उत्सवको अवसरमा फुटबलका साथ मावि स्तरीय वक्तृत्वकला र आधारभूत तह स्तरीय हाजिरी जवाफ प्रतियोगिता समेत हुने छ । बिद्यालयले मंसिर ६ देखि ८ गते सम्म आफ्नो बार्षिक उत्सव मनाउँदै छ । बिद्यार्थीहरुको खेलप्रतिभा,वाक र बौद्धिक विकासको लक्ष्य राखेर उक्त प्रतियोगिताका साथ बार्षिक उत्सव मनाउने तयारी गरिएको बिद्यालयले जनाएको छ ।
