नव–विवाहित जोडीलाई शुभकामना कार्ड प्रदान
-उज्यालो पोष्ट
ताप्लेजुङ, कात्तिक २७ । ताप्लेजुङको मैवाखोला गाउँपालिकामा नव–विवाहित जोडी (दम्पत्ति) लाई शुभकामना कार्ड (पत्र) प्रदान गर्न थालिएको छ । विवाहित जोडीलाई दाम्पत्य जीवन स्वास्थ्य, सुखमय र उज्ज्वल बनाउनमा सहयोग पुग्ने स्वास्थ्य सन्देशहरु समावेश गरिएको शुभकामना कार्ड प्रदान गर्न थालिएको हो ।
मैवाखोला गाउँपालिका–१ ढुंगेसाँघुमा नवविवाहित जोडी अर्थात भर्खरै वैवाहिक सम्बन्ध सुरुवात गरेका दम्पत्तिलाई स्वास्थ्य सन्देशहरु समावेश रहेको कार्ड प्रदान गरिएको छ । वडाध्यक्ष चन्द्रकुमार तामाङले वडा कार्यालयमा उपस्थित भएका विवाहित जोडीलाई मंगलबार उक्त शुभकामना कार्ड प्रदान गर्नुभएको हो ।
वडाध्यक्ष तामाङका अनुसार नव–विवाहित जोडीलाई प्रदान गरिएको शुभकामना कार्डमा प्रजनन् स्वास्थ्य, जन्मजात अपांगता रोकथाम लगायतमा अपनाउनुपर्ने सावधानी र तरिकाजस्ता स्वास्थ्य सन्देश रहेका छन् । सन्देशमुलक स्वास्थ्यसम्बन्धी जानकारी भएको शुभकामना कार्डले नव विवाहित जोडीको भविश्य सुखमय बनाउनमा सहयोग पुग्ने विश्वास राखिएको वडाध्यक्ष तामाङको भनाइ छ ।
वडा कार्यालयले पहिलो पटक यसखाले रचनात्मक कामको सुरुवात गरेको पनि उहाँले जानकारी दिनुभयो । विवाहित जोडीको जीवन सुखमय बनाउन साथै भावी सन्ततिको स्वस्थ स्वास्थ्यका लागि सहयोग पु¥याउने उद्देश्यले नवविवाहित दम्पत्तिलाई शुभकामना कार्ड प्रदान गर्ने अभियानको सुरु गरेको वडा कार्यालयले जनाएको छ ।
