सयपत्री सामुदायिक वनको २८ औं साधारणसभा सम्पन्न

-उज्यालो पोष्ट
ताप्लेजुङ, भदौ ८ । ताप्लेजुङको पाथीभरा याङ्वरक गाउँपालिका–३ तिरिङगेस्थित सयपत्री पोखरी सामुदायिक वन उपभोक्ता समूहको २८ औं वार्षिक साधारणसभा सम्पन्न भएको छ । तिरिङगेस्थित समूहको आफ्नै भवनमा वार्षिक साधारण सभा सम्पन्न भएको हो ।
साधारणसभाले वार्षिक कार्य प्रगति विवरण र आयव्यय विवरण बृहत् छलफल गर्दै पारित गरेको छ । सामुदायिक वन उपभोक्ता महासंघ नेपाल ताप्लेजुङका अध्यक्ष सुरज ओझाको प्रमुख आतिथ्यतामा भएको साधारणसभामा समूहले गर्ने आगामी काम तथा योजनाबारे पनि छलफल भएको छ ।
समूहका अध्यक्ष भीमबहादुर लिम्बूको अध्यक्षतामा भएको कार्यक्रममा प्रमुख अतिथि ओझाले समूहले गर्नुपर्ने काम, कर्तव्य, अधिकार तथा वनसम्बन्धी ऐन, कानुन र अन्य व्यवस्थाबारे प्रस्ट्याउँदै साधारणसभाका लागि शुभकामना मन्तव्य राख्नुभएको थियो । यस्तै साधारणसभा उद्घाटनमा तिरिङगेका पूर्व वडाध्यक्ष भीमबहादुर बस्नेत, हिमाली संरक्षण मञ्चका कार्यक्रम संयोजक रमेश राई र गोरखापत्रकर्मी पत्रकार चन्द्र पन्दाक (प्रयास)ले शुभकामना मन्तव्य राख्नुभएको थियो ।