मालपोत कार्यालयको राजस्व संकलन वृद्धि

-उज्यालो पोष्ट
ताप्लेजुङ, साउन ३ । ताप्लेजुङस्थित मालपोत कार्यालयमा गतवर्ष राजस्व संकलन वृद्धि भएको छ । मालपोत कार्यालयले अघिल्लो आर्थिक वर्षको तुलनामा आर्थिक वर्ष २०८०/८१ मा राजस्व संकलन वृद्धि गरेको हो ।
मालपोत कार्यालय ताप्लेजुङका सूचना अधिकारी खड्ग गुरुङका अनुसार गत आवमा कुल दुई करोड ७८ लाख ८८ हजार २८६ रुपियाँ राजस्व संकलन भएको छ । राजस्वबापत संकलन भएको कुल रकममध्ये प्रदेशअन्तर्गत एक करोड ६१ लाख ९२ हजार ५६४ रुपियाँ रहेको छ । त्यस्तै पुँजीगत अर्थात संघअन्तर्गत एक करोड १६ लाख ९५ हजार ७२२ रुपियाँ सूचना अधिकारी गुरुङले जानकारी दिनुभयो ।
अघिल्लो आर्थिक वर्षभन्दा गत आवमा ४९ लाख तीन हजार ९८९ रुपियाँ बढी राजस्व संकलन भएको मालपोत कार्यालयले जनाएको छ । मालपोत कार्यालय रजिस्ट्रेसन फाँटकी कर्मचारी दुर्गा पौडेल भट्टराईले रजिस्ट्रेसन सङ्ख्या गत आवमा कम भए पनि राजस्व भने वृद्धि भएको बताउनुभयो । उहाँका अनुसार अघिल्लो आवमा प्रदेशअन्तर्गत एक करोड ३५ लाख ४१ हजार २५२ रुपियाँ र पुँजीगत राजस्व ९४ लाख ४३ हजार ४५ रुपियाँ संकलन भएको थियो ।
रजिस्ट्रेसन सङ्ख्या भने गत आवको एक हजार ६३९ मात्र रहेको छ । अघिल्लो आव २०७९/८० को रजिस्ट्रेसन सङ्ख्या भने एक हजार ७४८ रहेको छ । पछिल्लो समय जिल्लामा दर्जनौ जलविधुत आयोजना सञ्चालनमा आउन थालेकाले गत आवमा राजस्व संकलन वृद्धि भएको मालपोत कार्यालयले जनाएको छ ।
मालपोत कार्यालयका सूचना अधिकारी गुरुङका अनुसार पुँजीगत अर्थात संघअन्तर्गत संकलित राजस्व रकम संघीय सरकारको खातामा जम्मा हुन्छ । प्रदेशअन्तर्गत संकलन भएको राजस्व रकम भने ४० प्रतिशत प्रदेश सरकार र ६० प्रतिशत स्थानीय सरकारको खातामा जम्मा हुने उहाँले जानकारी दिनुभयो ।