समानीकरण,सर्शत,बिशेष र समपूरक गरी आगामी आवमा ताप्लेजुङका स्थानीय तहले झण्डै साढे तीन अर्ब अनुदान पाउँदै

खगेन्द्र अधिकारी
ताप्लेजुङ,जेठ २० । अन्तर सरकारी वित्तीय हस्तातरण अन्तरगत आगामी आर्थिक बर्ष २०८१।८२ मा ताप्लेजुङका स्थानीय तहले कूल ३ अर्ब ४९ करोड ८६ लाख रुपैयाँ अनुदान पाउने भएका छन् ।

सबैभन्दा बढी फुङलिङ नगरपालिकाले १ अर्ब ३८ लाख रुपैयाँ अनुदान पाउने भएको छ । नगरपालिका बाहेक यहाँका ८ वटा गाउँपालिकाले २ अर्ब ४९ करोड ४८ लाख रुपैयाँ अनुदान पाउने छन् । सिरिजङ्गा गाउँपालिकाले ३७ करोड २८ लाख रुपैयाँ अनुदान पाउँदा आठराई त्रिबेणी गाउँपालिकाले ३४ करोड ७८ लाख रुपैयाँ अनुदान पाउने भएको छ । सिदिङ्वा गाउँपालिकाले ३३ करोड १८ लाख रुपैयाँ पाउने भएको छ । यस्तै पाथीभरा याङवरक गाउँपालिकाले ३१ करोड ३७ लाख रुपैयाँ अनुदान पाउने छ भने फक्ताङ्लुङ गाउँपालिकाले २९ करोड ८३ लाख रुपैयाँ अनुदान पाउने छ ।

मेरिङदेन गाउँपालिकाले २९ करोड १४ लाख,मैवाखोला गाउँपालिकाले २८ करोड ६९ लाख र मिक्वाखोला गाउँपालिकाले २५ करोड २१ लाख रुपैयाँ अनुदान पाउने भएका छन् । यो समानीकरण अनुदान, सर्शत अनुदान(चालू र पुँजीगत),बिशेष अनुदान( चालू र पुँजीगत) तथा समपूरक अनुदान(चालू र पुँजीगत) सहितको रकम हो । समानीकरण अनुदान अन्तरगत न्यूनतम् अनुदान,सूत्रमा आधारित अनुदान र कार्य सम्पादनमा आधारित अनुदानलाई बुझाउँछ ।