ताप्लेजुङको सिरिजङ्गाद्धारा एकीकृत घुम्ति सेवा शिविर सुरु,पहिलो दिनमै सेवाग्राहीको उत्साहजनक सहभागिता

खगेन्द्र अधिकारी
ताप्लेजुङ,फागुन २९ । प्रत्येक वडाका नागरिकलाई घरदैलोमा सेवा पु¥याउने उद्देश्य सहित एकीकृत घुम्ति सेवा शिविर सुरु गरेको ताप्लेजुङको सिरिजङ्गा गाउँपालिकाले वडा नं ६ मामाङ्खेमा पुगेर मंगलवारबाट सेवा बितरण सुरु गरेको छ ।

एकीकृत घुम्ति सेवा शिविरको पहिलो दिन १ सय ७७ जनाको स्वास्थ्य जाँच तथा निःशुल्क औषधि बितरण गरिएको प्राथमिक स्वास्थ्य केन्द्र तेल्लोकका मेडिकल अधिकृत डाक्टर सञ्जित भट्टराईले जानकारी दिनुभयो । उहाँका अनुसार परीक्षण गरिएकामध्ये ६५ प्रतिशत हाराहारी व्यक्ति रक्ताचाँपको समस्याबाट ग्रस्त भेटिएका छन् ।

एकीकृत घुम्ति शिविरका क्रममा मेची आँखा अस्पतालको प्राविधिक सहयोगमा आँखाको परीक्षण तथा उपचार गरिएको छ । मेची आँखा अस्पतालका नेत्र सहायक निरज दाहालका अनुसार मामाङ्खेमा १ सय ८९ जना आँखाका बिरामीको परीक्षणका क्रममा १२ जना मोतियाबिन्दुका बिरामी भेटिएका छन् । एकजना टेरिजम अर्थात् आँखामा मासु पलाएका बिरामीको शल्यकृया सिफारिस गरिएको छ । शिविरकै क्रममा ६५ जनालाई निःशुल्क चश्मा तथा अन्यलाई औषधि बितरण भएको छ ।

शिविरमा गाउँपालिकाले बितरण गर्ने सेवाका अलवा मेची आँखा अस्पताल बिर्तामोड झापाको प्राविधिक सहयोगमा आँखाको रोगीहरुको उपचार तथा परीक्षणका कार्य हुनेछन् । गाउँपालिकाले मोतियाबिन्दुमुक्त गाउँपालिका बनाउने गरी अभियान सञ्चालन समेत गरिरहेको छ । चैत ५,६ र ७ गते पालिकाको केन्द्र तेल्लोकमा मोतियाबिन्दुको शल्यकृयाका लागि छनौट भएका बिरामीहरुको आँखाको शल्यकृया समेत गरिने पालिकाले जनाएको छ ।

यस्तै कृषि विकास शाखाबाट ४६ जना सेवाग्राहीलाई अलैंचीमा लाग्ने रोग बिरुद्धको बिषादी बितरण तथा कृषि परार्मश सेवा बितरण गरिएको पालिकाका कृषि विकास शाखा प्रमुख सुमन भट्टराईले बताउनुभयो । सेवा बितरण अन्र्तगत पञ्जीकरणतर्फ २ जनाको जन्मदर्ताको प्रतिलिपि बितरण गरिएको पालिकाका एमआईएस अपरेटर लीलानाथ पौडेलले जानकारी दिनुभयो । ४ वटा अपाङ्गता परिचय पत्रको निबेदन संकलन गरिएको समेत पौडेलले बताउनुभयो ।

यस्तै बिभिन्न कार्य प्रयोजनका लागि वडा कार्यालयकोतर्फबाट १४ वटा सिफारिस पत्र बितरण भएको सिरिजङ्गा गाउँपालिका वडा नं ६ मामाङ्खेका वडा सचिव बिशालकुमार शाहले बताउनुभयो । यस्तै वडाबाट एकथान नाता प्रमाणित समेत भएको छ ।
नेपाल बैंक लिमिटेड तेल्लोक शाखामार्फत १४ जना सेवाग्राहीको स्थलगत रुपमै बैंक खाता खोल्ने सहितका बैंकिङ परार्मश सेवा बितरण भएको शाखाका कर्मचारी मिलन बिकले बताउनुभयो ।

मामाङ्खेकै शिविरमार्फत ४ वटा व्यवसाय दर्ता गरिएको सिरिजङ्गा गाउँपालिकाको प्रशासन शाखाका भवानीराज लामिछानेले जानकारी दिनुभयो । पालिकाका सूचना अधिकारी तथा स्वास्थ्य संयोजक संजीव सिंहका अनुसार शिविरको पहिलो दिन देखि नै सेवा लिन उल्लेख्य मात्राका सेवाग्राही शिविरमा आएका छन् । सिंहका अनुसार शिविरकै क्रममा सूर्तिजन्य पदार्थ तथा मद्यपान सेवन न्यूनीकरण सम्वन्धी सचेतनामूलक कार्यक्रम समेत गरिएको छ । मामाङ्खेबाट सुरु भएको घुम्ति शिविर चैत ७ गते पालिकाको केन्द्र तेल्लोक आएर टुङ्गिने पालिकाका प्रमुख प्रशासकीय अधिकृत मधुर नेपालीले जानकारी दिनुभयो । सिरिजङ्गा गाउँपालिकामा ८ वटा वडा रहेका छन् ।

एकीकृत घुम्ति शिविरमा जन्म,मृत्यु,बिबाह,बसाँईसराई सहितका कार्य हुने व्यक्तिगत घटना दर्ता,बैंक खाता खोल्ने,व्यवसाय दर्ता तथा नविकरण,निःशुल्क औषधि बितरण तथा चेकजाँच र उपचार र गाउँपालिका तथा वडाबाट सञ्चालन हुने योजनाको प्राविधिक मूल्याङ्कन,सम्झौता र अनुगमन सहितका कार्य हुने भएका छन् । शिविरको उद्घाटन सत्रमा पालिका उपाध्यक्ष डाक्टर चित्रकुमार मावो लिम्बू,प्रमुख प्रशासकीय अधिकृत नेपाली,वडा नं ६ का वडाध्यक्ष सुखराज मावो,गाउँसभाका सदस्यहरु तथा पालिकाका बिभिन्न बिषयगत शाखाका प्रमुख तथा कर्मचारीहरुको सहभागिता रहेको थियो ।