ताप्लेजुङको सिरिजङ्गाद्धारा पालिकाभरीका वडावासीकै घरदैलोमा सेवा पु¥याउन एकीकृत घुम्ति शिविर आयोजना

खगेन्द्र अधिकारी
ताप्लेजुङ,फागुन १५ । ताप्लेजुङको सिरिजङ्गा गाउँपालिकाले प्रत्येक वडाका नागरिकलाई घरदैलोमै सेवा पु¥याउन १० दिने एकीकृत घुम्ति शिविर सञ्चालन गर्ने भएको छ ।

फागुन २९ गते वडा नं ६ मामाङ्खेबाट सुरु हुने घुम्ति शिविर चैत ७ गते पालिकाको केन्द्र तेल्लोक आएर टुङ्गिने पालिकाका प्रमुख प्रशासकीय अधिकृत मधुर नेपालीले जानकारी दिनुभयो । सिरिजङ्गा गाउँपालिकामा ८ वटा वडा रहेका छन् । नेपालीका अनुसार फागुन २९ गते लक्ष्मी मावि मामाङ्खे,वडा नं ८ याम्फुदिनका सेवाग्राहीलाई समेत लक्षित गरी वडा नं ७ खेवाङस्थित गणेश माविमा ३० गते,वडा नं १ सिनामस्थित सिनाम माविमा चैत १ गते एकिकृत घुम्ति शिविर सञ्चालन हुने भएको छ ।

चैत २ गते वडा नं २ आम्बेगुदिनस्थित रजा माविमा,३ गते वडा नं ३ सिकैचास्थित सरस्वती मावि कुञ्जारीमा तथा ४ र ५ गते वडा नं ५ पेदाङ र वडा नं ४ तेल्लोकका सेवाग्राहीलाई समेत लक्षित गरी पालिकाको केन्द्रस्थित प्राथमिक स्वास्थ्य केन्द्र तेल्लोकमा एकीकृत घुम्ति शिविर हुने भएको छ । गाउँपालिकाले मोतियाबिन्दुमुक्त गाउँपालिका बनाउने गरी अभियान सञ्चालन समेत गरिरहेको छ ।

चैत ५,६ र ७ गते पालिकाको केन्द्र तेल्लोकमा मोतियाबिन्दुको शल्यकृयाका लागि छनौट भएका बिरामीहरुको आँखाको शल्यकृया समेत गर्ने तयारी रहेको प्रमुख प्रशासकीय अधिकृत नेपालीले जानकारी दिनुभयो । एकीकृत घुम्ति शिविरमा जन्म,मृत्यु,बिबाह,बसाँईसराई सहितका कार्य हुने व्यक्तिगत घटना दर्ता,बैंक खाता खोल्ने,व्यवसाय दर्ता तथा नविकरण,निःशुल्क औषधि बितरण तथा चेकजाँच र उपचार र गाउँपालिका तथा वडाबाट सञ्चालन हुने योजनाको प्राविधिक मूल्याङ्कन,सम्झौता र अनुगमन सहितका कार्य हुने भएका छन् ।