‘सबै लागेर दादुरा–रुबेला बिरुद्ध खोप अभियान सफल बनाऔं’
खगेन्द्र अधिकारी
ताप्लेजुङ,फागुन १३ । स्वास्थ्य कार्यालय ताप्लेजुङले फागुन १८ देखि २८ गते सम्म दुईचरणमा ताप्लेजुङ जिल्लाभर सञ्चालन हुने दादुरा–रुबेला बिरुद्ध खोप अभियानमा उमेर समूहका सबै बालबालिकालाई अनिवार्य सहभागी गराईदिन सहयोगको अपेक्षा गरेको छ ।
स्वास्थ्य कार्यालयले आइतवार फुङलिङमा आयोजना गरेको जिल्ला स्तरीय दादुरा–रुबेला खोप अभियान तयारी तथा नियमित खोप सुद्रिढीकरण कार्यक्रममार्फत यस्तो आग्रह गरेको हो । स्वास्थ्य कार्यालय ताप्लेजुङका बरिष्ठ जनस्वास्थ्य अधिकृत योगराज घिमिरेले ९ महिना देखि ५ बर्ष मुनिका सबै बालबालिकालाई दादुरा–रुबेला खोप दिनु अनिवार्य रहेकोले सम्वन्धित खोपकेन्द्रमार्फत उमेर समूहका सबै बालबालिकालाई खोप उपलब्ध गर्ने गराउने वातावरणका लागि सबै पक्षसंग सहयोगको याचना गर्नुभएको छ ।‘यो हामी सबैको साझा अभियान भएकोले यसको प्रभावकारी उपयोगले मात्र सफलता प्राप्त गर्न सकिन्छ’घिमिरेले भन्नुभयो ।
जिल्ला स्वास्थ्य कार्यालय ताप्लेजुङको प्रमुखको कार्यभार सम्हाल्न आइपुग्नु भएका जनस्वास्थ्य निरीक्षक कूलबहादुर पौडेलले खोप पाउनुपर्ने कोहिपनि खोप अभियानबाट छुट्न नहुने भएकोले त्यो वातावरणका लागि जनप्रतिनिधि,राजनीतिक दल,नागरिक समाजका अगुवा,बुद्धिजीवि,शिक्षक र समाजका हरेक व्यक्ति तथा निकायबाट सहयोग प्राप्त हुने विश्वास लिनुभयो । ताप्लेजुङमा पहिलो चरणमा फागुन १८ देखि २२ गते सम्म फुङलिङ नगरपालिका सहित पाथीभरा याङ्वरक गाउँपालिका,सिदिङ्वा गाउँपालिका र सिरिजङ्गा गाउँपालिकाका सम्वन्धित खोपकेन्द्रमार्फत नियमित खोपसंगै दादुरा–रुबेला बिरुद्धको खोप दिईदैंछ । स्वास्थ्य कार्यालय ताप्लेजुङका कोल्डचेन सुपरभाईजर दिनेश रायका अनुसार दोस्रो चरणमा फागुन २४ देखि २८ गते सम्म मैवाखोला गाउँपालिका,मेरिङदेन गाउँपालिका,मिक्वाखोला गाउँपालिका,आठराई त्रिबेणी गाउँपालिका र फक्ताङलुङ गाउँपालिकाका सम्वन्धित खोप केन्द्रमार्फत खोप अभियान सञ्चालन गरिदैं छ । ताप्लेजुङका करिव १० हजार बालबालिकालाई यस्तो खोप प्रदान गर्ने स्वास्थ्य कार्यालयले लक्ष्य लिएको छ ।
कार्यक्रममा फुङलिङ नगरप्रमुख अमिर मादेनले बालबालिकाको स्वास्थ्य जटिलता जोगाउन दादुरा–रुबेला बिरुद्धको खोप अनिवार्य भएकोले खोप अभियान सफल बनाउन जनप्रतिनिधिहरुकोतर्फबाट उल्लेख्य सहयोग प्राप्त हुने विश्वास दिलाउनुभयो । अभियान सफल बनाउन उहाँले सबैलाई आग्रह समेत गर्नु भएको छ । जिल्ला समन्वय समिति उपप्रमुख कृष्णप्रसाद लिङखिमले बालबालिकाको स्वास्थ्यलाई बेलैमा ख्याल नगरिए अकल्पनीय दुःख समेत झेल्नुपर्ने भएकोले उमेर समूहका सबै बालबालिकालाई पायक पर्ने केन्द्रमार्फत खोप दिलाउने वातावरणका लागि घरपरिवारका सदस्य तयार र सम्बेदनशिल हुनुपर्ने बताउनुभयो । प्रमुख जिल्ला अधिकारी हीरादेवी पौडेलले अभियान सफल बनाउन सबैको सहयोग र समन्वयको खाँचो औंल्याउँदै आफु र आफ्नो निकायबाट प्राप्त हुने सबै सहयोग प्राप्त हुनेमा विश्वस्त रहन स्वास्थ्य कार्यालयलाई आग्रह गर्नुभयो ।
दादुरा रोग ज्यादै छिटो सर्ने भाइरसबाट हुने संक्रामक रोग हो । यो कुनैपनि उमेर समूहका लागि लाग्न सक्ने भएपनि ५ बर्ष मुनिका बालबालिकामा यो रोग धेरै पाइने गरेको छ । रुबेला रोग दादुरा रोग जस्तै भाइरसबाट हुन सक्ने एक प्रकारको संक्रामक रोग हो । सामान्य रुघाखोकीको रुपमा यो रोग बालबालिका तथा बयस्कहरुमा देखिन्छ । दादुरा–रुबेला रोगबाट बच्ने सबैभन्दा उत्तम उपाय भनेको खोप नै भएकोले खोप लगाएर रोग लाग्न नदिन स्वास्थ्य कार्यालय ताप्लेजुङले आग्रह समेत गरेको छ ।
