इखाबुका पहिरो पीडितलाई राहत वितरण

-उज्यालो पोष्ट
ताप्लेजुङ, भदौ २५ । फक्ताङ्लुङ गाउँपालिका–४ इखाबुका पहिरो पीडित परिवारलाई राहत वितरण गरिएको छ । शनिबार वर्षासँगै गएको पहिरोका कारण घर क्षतिग्रस्त भएका र जोखिममा परेका परिवारलाई राहत सामग्री वितरण गरिएको हो ।
फक्ताङ्लुङ गाउँपालिका र नेपाल रेडक्रस सोसाइटी ताप्लेजुङले पहिरोले घर क्षतिग्रस्त भई विस्थापित भएका बिरहाङ लिम्बू र भक्तबहादुर लिम्बूको परिवारसमेत नौ परिवारलाई सोमबार राहत सामग्री वितरण गरेको हो । घर पूर्णरुपमा क्षति भएका दुई परिवारलाई ५० किलोग्रामका दरले चामलसहितका खाद्यान्न सामग्री र एक–एक थान त्रिपाल वितरण गरिएको छ ।
रेडक्रस सोसाइटीले पनि पहिरोमा घर गुमाएका दुई परिवारलाई भाँडावर्तन, लत्ताकपडा लगायतका सामग्री वितरण गरेको गाउँपालिका अध्यक्ष राजन लिम्बू (मुक्ति) का स्वकीय सचिव दिलकुमार पतङ्वाले जानकारी दिनुभयो । उहाँका अनुसार इसाई समाज फक्ताङ्लुङ गाउँपालिकाले पनि दुई परिवारलाई ३० किलोग्रामका दरले चामल वितरण गरेको छ ।
यस्तै घर उच्च जोखिममा परेका रामकुमार लिम्बू, दिलिप लिम्बू, चैतन्य लिम्बू, मकरध्वज लिम्बू र आर्यन लिम्बू तथा जोखिममा परेको सुशील लिम्बू र धनबीर लाबुङको परिवारलाई गाउँपालिकाको तर्फबाट एक–एक थान त्रिपाल उपलब्ध गराएको उहाँले जानकारी दिनुभयो । पहिरो पीडित परिवारलाई प्रभावित क्षेत्रमै पुगेर गाउँपालिका अध्यक्ष लिम्बूसहितको टोलीले राहत सामग्री वितरण गरेको जनाइएको छ ।
यता बस्न नमिल्नेगरी बिरहाङ र भक्तबहादुरको घर पहिरोले क्षति पुर्याउँदा करिव ३० लाख २० हजार ८०० रुपियाँ बराबरको क्षति हुनगएको अनुमान पनि स्थानीयले गरेका छन् । यकिन विवरण भने आउन बाँकी रहेको बताइएको छ ।