ताप्लेजुङ गोल्डकपको खेल तालिका सार्वजनिक,पहिलो खेलमा ताप्लेजुङ र ईटहरीको टिम भिड्ने

खगेन्द्र अधिकारी
ताप्लेजुङ,भदौ ११ । भदौ १४ गते देखि हुने ताप्लेजुङ गोल्डकपको खेल तालिका सार्वजनिक भएको छ । यहिँ बिहीबार जनैपूर्णिमाको दिनदेखि फुङलिङस्थित भानुजन माध्यमिक विद्यालय अम्बिटारको खेलमैदानमा सुरु हुने गोल्डकपको उद्घाटन खेलमा गृहटिम ताप्लेजुङको मानाभरा स्पोर्टिङ क्लबले आमन्त्रित जुट बिकास फुटबल एकेडेमी ईटहरीसंग प्रतिश्पर्धा गर्ने भएको छ ।

आयोजक लाखेजात्रा खेल सञ्चालन समितिका सचिव टिकेन्द्र नेपालीका अनुसार भदौ १५ गते हुने दोस्रो खेलमा इलामको रेडहर्ष फुटबल क्लव र दमक झापास्थित गोर्खा स्पोर्टिङ क्लब आमनेसामने हुँदै छन् । भदौ १६ गते पाँचथरको फिदिम स्पोर्टिङ क्लवको भेट मोरङको पथरी–११ फुटबल क्लबसंग हुने छ । भदौ १७ गते रेडस्टार फुटबल क्लव बिर्तामोड झापाले र दार्जिलिङ भारतको युनाईटेड खर्साङ फुटबल क्लवसंग पहिलो चरणको अन्तिम प्रतिश्पर्धा गर्ने छ । यस्तै भदौ १८ र १९ गते सेमिफाईनल चरणका खेल हुनेछन् । लाखेजात्राको अबसरमा सञ्चालन गर्न लागिएको गोल्डकपको फाईनल भदौ २० गते श्रीकृष्ण जन्मअष्टमीको दिन हुनेछ ।

प्रतियोगिताको विजेताले ३ लाख ११ हजार १ सय ११ रुपैयाँ र उपबिजेताले १ लाख ५१ हजार १ सय ११ रुपैयाँ सहित ट्रफि, मेडल र प्रमाण–पत्र प्राप्त गर्ने आयोजकले बताएको छ । आयोजक संस्थाले प्रतियोगिताको पहिलो चरणका खेलमा जनही १ सय ५०,सेमी फाईनलका खेलहरुमा जनही २ र फाइनल खेलमा जनही २ सय ५० रुपैयाँ प्रवेश शुल्क निर्धारण गरेको जनाएको छ । आयोजक लाखेजात्रा खेल सञ्चालन समितिका अध्यक्ष देवराज गुरुङका अनुसार खेल सञ्चालनका लागि करिव ४७ लाख रुपैयाँ खर्च हुने अनुमान छ । खेल मैदान व्यवस्थापनमै धेरै रकम खर्च भइसकेको गुरुङले जानकारी दिनुभयो। प्रतियोगिताको दोस्रो पुरस्कारको प्रायोजन फुङलिङ निवासी स्वर्गीय भीमप्रसाद मादेनका परिवार र आफन्तजनले गर्ने हुनु भएको छ ।