सुआहारा कार्यक्रमको निरन्तरता चाहन्छन् ताप्लेजुङका सरोकारवाला,भने‘जस्तो सहयोग गर्न पनि तयार छौं’

खगेन्द्र अधिकारी
ताप्लेजुङ,बैशाख ३१ । ताप्लेजुङको फुङलिङ नगरपालिका दोखुकी महिला स्वास्थ्य स्वयंसेविका ममता पालुङ्वाले सुआहारा कार्यक्रममार्फत स्वास्थ्य र सफाई बाहेक पोषण तथा खाद्य सुरक्षाका बिबिध आयाम बारे जानकारी पाउनुभयो । उहाँलाई अझै यो कार्यक्रममार्फत गाउँ समाजमा सन्देश प्रवाह गर्ने इच्छा छ । तर सुआहारा दोस्रो कार्यक्रमको अवधि समेत समाप्त हुन लागेको सुन्दा उहाँ खिन्न हुनुहुन्छ ।‘सुआहारा कार्यक्रमले समेट्ने सबै क्षेत्र समाजमा पस्किएर मात्र बिदा हुन पाएको भए यसले ताप्लेजुङमा धेरै सुधार ल्याउने थियो’कार्यक्रमको निरन्तरता चाहँदै उहाँले भन्नुभयो ।

सुआहारा कार्यक्रममार्फत समुदायमा पुगेको स्वास्थ्य र सफाईको जागरणको अवसर पर्याप्त भई नसकेको महशुष गैर सरकारी संस्था महासंघका जिल्ला अध्यक्ष खड्गबिक्रम सुबेदीलाई भइरहेको छ ।‘स्वास्थ्य र सफाईको क्षेत्रमा सुआहारा कार्यक्रमले धेरै ज्ञान दिएको छ,तर निश्चित अवधि लगाएर यसलाई पूर्ण बनाउने प्रयासमा लाग्नु पर्छ’ताप्लेजुङमा सुआहाराको निरन्तरता अनिवार्य छ’ सुबेदीले भन्नुभयो । पत्रकार महासंघ ताप्लेजुङका अध्यक्ष आनन्द गौतम सुआहारा कार्यक्रमले दिएको ज्ञानमार्फत ताप्लेजुङको स्वास्थ्य र सफाईको क्षेत्रका सकारात्मक परिवर्तन आएको देख्नुहुन्छ ।‘तर केहि समय अझै यो कार्यक्रमलाई निरन्तरता दिएर यो सूचकद्धारा समुदाय स्तरमा पर्याप्त सुधारको संकेत दिनु पर्छ’गौतमले सुआहारा कार्यक्रमले बीचमै बाटो नछाड्ने बिश्वास लिदैं भन्नुभयो । जनस्वास्थ्य अधिकृत पशुपति खनाल यो कार्यक्रम सुरु भएपछि स्वास्थ्य,सफाई,पोषण र गर्भवती महिला तथा बालबच्चाको दैनिकीमा सुधार आएको तर पर्याप्त भइनसकेको बताउनुहुन्छ । उहाँले अहिले सम्मको सिकाईबाट सुधार गर्नुपर्ने क्षेत्रमा थप अवधि खर्च गरी स्वास्थ्य र सफाईमा ताप्लेजुङलाई अब्बल बनाउन सुआहारा कार्यक्रमको निरन्तरता अनिवार्य देखेको अनुभव सुनाउनुभयो ।

प्रमुख जिल्ला अधिकारी गोमादेवी चेम्जोङ समुदायमा जागरण प्रवाहका लागि सुआहारामार्फत भएका गतिविधिको खुलेर प्रशंसा गर्न सकिने बताउनुभयो ।‘यसलाई फेरी कसरी सञ्चालनमा ल्याउने भन्ने स्वरुपका बारेमा छलफल होला,तर यसको यात्रा टुङिगनु हुदैन’चेम्जोङले यो कार्यक्रमको निरन्तरतामा जोड दिनुभयो । फुङलिङ नगर उपप्रमुख भीमादेवी ओझाले जनप्रतिनिधिकोतर्फबाट कस्तो सहयोग चाहिएको हो,त्यो दिन तयार रहेको तर ताप्लेजुङमा सुआहारा कार्यक्रमको अवधि यहिँ समाप्त हुन नहुने बताउनुहुन्छ ।

सरोकारवालाको कुरा सुनेपछि सुआहारा कार्यक्रम जिल्ला परियोजना सल्लाहकार समितिका संयोजक एवम् जिल्ला समन्वय समिति प्रमुख छिरिङ लामाले यो कार्यक्रमको निरन्तरता जिल्लाको आवश्यकताको रुपमा रहेको बताउनुभयो ।‘हामी जिल्लासभा,नगरसभा र गाउँसभाबाट आगामी सहकार्यका बारेमा बिशेष प्रस्ताव नै पारित गरौंला,तर यो कार्यक्रम यतिमै मात्र सिमित गर्नु भएन’लामाले भन्नुभयो । उहाँले सुआहारा कार्यक्रमले ताप्लेजुङमा प्राप्त गरेको नतिजालाई निश्चित गन्तव्यमा पु¥याएर मात्र हात झिक्ने योजना बनाउनुपर्नेमा जोड दिनुभयो । यसोभएमा समग्र जिल्लालाई सुखद् नतिजातर्फ अघि बढाउने उहाँको बिश्वास थियो ।

सुआहारा दोस्रो कार्यक्रमका जगदिश दासका अनुसार सुआहारा कार्यक्रम (दोस्रो चरण) भने समाप्त भएको छ । यो कार्यक्रममार्फत ताप्लेजुङमा स्वास्थ्य,सफाई,पोषण र गर्भवती महिला तथा बालबच्चाको स्वास्थ्य अवस्था र दैनिकीमा पर्याप्त सुधार आएको छ ।‘तर यो पूर्ण छैन र यस्ता अभियानलाई निरन्तरता दिनु पर्छ’दासले भन्नुभयो । सुआहारा कार्यक्रमका बरिष्ठ मूल्याङ्कन सल्लाहकार सुबिर कोलेका अनुसार सुआहाराको तेस्रो चरणको कार्यक्रम भित्रनेमा बिश्वास राख्दै यसको स्वरुप र क्षेत्रबारे अहिले केहि भन्न नसकिने बताउनुभयो । महिला र बालबालिको पोषण तथा स्वास्थ्यमा सुधार ल्याउन सन् २०१६ देखि ताप्लेजुङ सहितका ४२ जिल्लामा सुआहारा कार्यक्रम सञ्चालनमा थियो ।