फुङलिङ नगरपालिकाद्धारा बजेटको आकारमा बृद्धि,६४ वटा योजना तथा कार्यक्रम शंसोधन

खगेन्द्र अधिकारी
ताप्लेजुङ,चैत ६ । ताप्लेजुङको फुङलिङ नगरपालिकाको १३ औं नगरसभाले चालू आर्थिक बर्षको बजेटको आकार बढाएको छ । सभा ४ करोड रकम थप गरी चालू आवको बजेटको आकार ७२ करोड ७६ लाख ६५ हजार १ सय रुपैयाँको बनाएको छ ।
सोमवार भएको नगरसभामा सभाध्यक्ष तथा नगरप्रमुख अमिर मादेनले नगर उपप्रमुख भीमादेवी ओझालाई चालू आवको बजेट तथा कार्यक्रम शंसोधन प्रस्ताव पेश गर्न अनुमति दिनु भएको थियो । ओझाले प्रस्तुत गरेको शंसोधन प्रस्ताव नगरसभाले पारित गरेको प्रमुख प्रशासकीय अधिकृत तिलोचन रिमालले जानकारी दिनुभयो । नगर उपप्रमुख ओझाले चालू आवका लागि ६८ करोड ८३ लाख ७ हजार १ सय १० रुपैयाँको बजेट पेश गर्नु भएको थियो । दशौं नगरसभाबाट स्वीकृत सो बजेटमध्ये शसर्त अनुदानतर्फ १ करोड ४० लाख रुपैयाँ कटौति हुँदा ४ करोड २६ लाख ५७ हजार ७ सय रुपैयाँ थप भएको छ । उता आन्तरिक स्रोततर्फ अल्या र मालपोत दस्तुरबाट १ करोड ७ लाख रुपैंया बृद्धि भई बजेटको आकार बढेको नगरपालिकाले जनाएको छ । बजेटको आकार बढेसंगै नगरसभाले साविक रहेका ६४ वटा योजना तथा कार्यक्रमको बजेट समेत शंसोधन गरेको नगरपालिकाका उपप्रमुख ओझाले जानकारी दिनुभयो । यता,नगरपालिकाले पुँजीगततर्फका योजनाको भौतिक प्रगति ३१.०७ प्रतिशत मात्र रहेको जनाएको छ । नगर उपप्रमुख ओझाका अनुसार बित्तीय प्रगति चाँहि ४३.३९ प्रतिशत रहेको छ । दशौं नगरसभाले चालू आवका लागि २ सय ८० वटा विकास योजना छनौट गरेकोमा चालू आवको फागुन मसान्त सम्म १ सय ८५ वटा उपभोक्ता समितिसंग(ठेक्का सम्झौता सहित)सम्झौता गरिएको छ । ति मध्ये हाल सम्म ८७ वटा योजना सम्पन्न भई फरफारकको क्रममा रहेको नगरपालिकाले जनाएको छ ।
नगरपालिकाका अनुसार चालू आवका लागि बिनियोजित चालू बजेट ४३ करोड ८५ लाख १५ हजार ४ सय १० रुपैयाँमध्ये ४३ प्रतिशत अर्थात् २० करोड ३५ लाख ३ हजार ८ सय ८० रुपैंया खर्च भएको छ । यस्तै पुँजीगततर्फ २९ करोड ११ लाख ४९ हजार ९ सय रुपैयाँ बिनियोजित बजेटमध्ये ३८.५५ प्रतिशत अर्थात् ११ करोड २२ लाख ५३ हजार १ सय ४४ रुपैयाँ खर्च भएको नगरपालिकाले जनाएको छ । यसैबीच,नगरपालिकाले चालू आर्थिक बर्षका लागि निर्धारण गरेको लक्ष्यको ५८.५८ प्रतिशत राजश्व असुल गरेको जनाएको छ । नगर उपप्रमुख ओझाका अनुसार चालू आवका लागि १ करोड ९८ लाख रुपैयाँ राजश्व असुल हुने लक्ष्य राखिएकोमा फागुन मसान्त सम्ममा १ करोड १६ लाख रुपैयाँ रावश्व असुल भएको छ । नगरपालिकाले चालू आवको अन्त्य सम्ममा आन्तरिक राजश्व असुलीमा लक्ष्य भन्दा बढी असुली गर्ने संकेत गरेको छ । नगरसभाले नगरपालिकाका कर्मचारीको व्यवस्थापन एवम् समायोजन बिधयेक २०७९ लाई स्वीकृत पनि गरेको छ ।