भरुवा बन्दुकसहित एक पक्राउ
उज्यालो पोष्ट
ताप्लेजुङ, मङ्सिर २५ । ताप्लेजुङमा आफ्नै दाजुलाई भरुवा बन्दुक प्रहार गरी हत्याको प्रयास गर्ने एकजनालाई प्रहरीले पक्राउ गरेको छ । जिल्लाको फक्ताङ्लुङ गाउँपालिका–५ तापेथोकको वैताङ्गु बस्ने ४१ वर्षीय कुमार लिम्बूलाई अबैध भरुवा बन्दुकसहित प्रहरीले पक्राउ गरेको हो ।
जिल्ला प्रहरी कार्यालय ताप्लेजङका सूचना अधिकारी एवम् प्रहरी निरीक्ष कुसराम कार्कीकाअनुसार लिम्बूले गएको शुक्रबार राति ८ बजेतिर आफ्नै दाजु ४४ वर्षीय धनबहादुर लिम्बूमाथि भरुवा बन्दुक प्रहार गरी हत्याको प्रयास गरेका थिए । दाजुलाई ताकेर भरुवा बन्दुक ताकेर पड्काए पनि नलागेका कारण ज्यान भने बचेको प्रहरी निरीक्षक कार्कीले जानकारी दिनुभयो ।
तापेथोक प्रहरी चौकीबाट खटेका प्रहरी टोलीले लिम्बूलाई भरुवा बन्दुकसहित पक्राउ गरेको हो । यता परेका लिम्बूउपर ज्यान मार्ने उद्योग तथा हातहतियार खरखजनासम्बन्धी मुद्दा दर्ता गरी अनुसन्धान सुरु गरिएको जिल्ला प्रहरी कार्यालयले जनाएको छ ।
