पाथीभरा म्याराथनका बिजेताले साढे एकलाख पुरस्कार पाउने,एकलाख जनाले भ्रमण तथा अवलोकन गर्ने लक्ष्य

खगेन्द्र अधिकारी
ताप्लेजुङ,भदौ ६ । एकलाख जनाले अवलोकन तथा सहभागिता जनाउने लक्ष्य सहित आउँदो असोज ११ गते देखि ताप्लेजुङमा हुने पाथीभरा म्याराथनका बिजेताले पाउने पुरस्कार रकम सार्वजनिक भएको छ ।

पाथीभरा म्याराथन तथा पर्यटन महोत्सव मूल समारोह समितिले सोमवार पत्रकार सम्मेलनमार्फत महोत्सव अवधिमा एकलाख मानिसहरु पाथीभरा दर्शन सहित महोत्सवको अवलोकनमा सहभागी हुने लक्ष्य रहेको जनाएको छ ।‘पाथीभरामा बर्षभरीमा कम्तिमा ५ लाख जनाले दर्शन गर्ने र महोत्सव अवधिमा कम्तिमा एकलाख जनाले पाथीभराको दर्शन तथा महोत्सवको अवलोकन गर्ने अनुमान गरेका छौं’पाथीभरा म्याराथन तथा पर्यटन महोत्सव मूल समारोह समितिका संयोजक तारानाथ घिमिरेले भन्नुभयो । पाथीभरा दर्शनको मुख्य सिजनकै बेला महोत्सव आयोजना भएकोले दर्शनार्थी र महोत्सवका सहभागीको संख्या अपेक्षाकृत लक्ष्य भन्दा बढी हुने मूल समारोह समितिले अनुमान गरेको छ ।

घिमिरेका अनुसार खुल्ला म्याराथनतर्फ प्रथम हुनेले नगद १ लाख ५१ हजार १ सय ५१ रुपैंयाका साथ प्रमाणपत्र पाउने छन् । द्धितीय हुनेले नगद १ लाख ११ हजार १ सय ११ र तृतीय हुनेले ५१ हजार १ सय ११ रुपैंया पुरस्कारका साथ प्रमाणपत्र पाउने छन् । यस्तै महिला हाफ म्याराथनमा प्रथम हुनेले ८१ हजार १ सय ११ रुपैंयाका साथ प्रमाणपत्र प्राप्त गर्दा द्धितीय हुनेले ५१ हजार १ सय ११ का साथ प्रमाणपत्र पाउने छन् । तृतीय हुनेले नगद ३१ हजार १ सय ११ रुपैंयाका साथ प्रमाण्पत्र प्राप्त गर्ने मूल समारोह समितिले जनाएको छ । खुल्ला म्याराथन तथा महिला हाफ म्याराथनमा दशौं स्थान सम्मको नतिजा ल्याउनेलाई प्रोत्साहन स्वरुप जनही ५ हजार रुपैंया नगदका साथ प्रमाणपत्र प्रदान गरिने भएको छ । पुरस्कारको सबै रकमको प्रायोजन हिमालयन् गाईड्स ट्रेक्स एण्ड एक्सपीडिसन प्रालिले गर्ने भएको छ ।

ताप्लेजुङको फुङलिङ नगरपालिका वडा नं ९ हाङ्देवा घर भई हाल काठमाण्डौमा पर्यटन व्यवसायीका रुपमा रहनु भएका हिमालयन् गाईड्स ट्रेक्स एण्ड एक्सपीडिसन प्रालिका महाप्रवन्धक ईश्वरी पौडेलले म्याराथनको सुरुआत २०६५ सालबाट नै पुरस्कार रकम प्रायोजन गर्दै आउनु भएको छ । पौडेलको अगुवाईमा रहेको हिमालयन् गाईड्स नेपालकै सफल पर्यटन व्यवसायी केन्द्रको रुपमा परिचित रहेको छ । विश्वका अग्ला शिखर सगरमाथा,कञ्चजंघा सहितका नाम चलेका हिमालको आरोहण तथा एक्सपीडिसन गराउनेमा हिमालयन् गाईड्स नेपालका अब्बल पर्यटन व्यवसायी केन्द्रमध्येमा रहेको छ ।

साविकमा महाशिवरात्री तथा सेना दिवसको अवसरमा हुने महोत्सव तथा म्याराथन यसबर्ष सो भन्दा केहि महिना अघि असोज दोस्रो सातामै हुन लागेको हो । कोरोना सन्त्रासका कारण २०७६ साल फागुनमा भएको महोत्सव पछि महोत्सवको अर्को संस्करण सञ्चालन हुन सकेको थिएन । पाथीभरा देवी मन्दिर क्षेत्र संरक्षण तथा सम्वद्र्धन समिति,पाथीभरा क्षेत्र विकास समिति र नेपाली सेनाको यहाँस्थित भीमकाली गुल्म तीनवटै निकाय संयुक्त आयोजक रहेका छन् । बडादशैं र भीमकाली गुल्मको बार्षिक उत्सव समेतको अवसर पारेर यो कार्यक्रम गर्न लागिएको हो ।