ताप्लेजुङमा पालिका अनुसार मतपत्र रुजु र प्याकेजिङ गर्न सुरु,३ वटा पालिकाको सकियो

खगेन्द्र अधिकारी
ताप्लेजुङ,बैशाख २० । मुख्य निर्वाचन अधिकृतको कार्यालय ताप्लेजुङले पालिका अनुसार मतपत्र रुजु र प्याकेजिङ(सटिङ)गर्ने कार्य सुरु गरेको छ ।

ताप्लेजुङका ९ स्थानीय तहका लागि प्राप्त भएका मतपत्र पालिकाको मतदाता संख्या अनुसार रुजु र प्याकिङ गर्न थालिएको मुख्य निर्वाचन अधिकृतको कार्यालयका सहायक निर्वाचन अधिकृत पुष्पराज बाँस्तोलाले जानकारी दिनुभयो । उहाँका अनुसार अहिले सम्म फुङ्लिङ नगरपालिका,आठराइ त्रिबेणी गाउँपालिका र फक्ताङ्लुङ गाउँपालिकाको मतपत्र सटिङ गरी सकिएको छ । करिव ९६ हजार थान मतपत्र रुजु र प्याकेजिङ गर्नुपर्ने तयारी भएको छ । यसमध्ये ३८ हजार थान मतपत्र रुजु र प्याकिङ गरिसकिएको मुय निर्वाचन अधिकृतको कार्यालयले जनाएको छ । मंगलवारबाट अन्य पालिकाहरुका लागि मतपत्र रुजु र प्याकेजिङ गर्ने कार्य सुरु हुने उहाँले बताउनुभयो ।

निर्वाचन आयोगले जारी गरेको स्थानीय तह निर्वाचन जनशक्ति व्यवस्थापन निर्देशिका २०७८ अनुसार ५० वटा सम्म मतदान केन्द्र भए मतपत्र रुजु र प्याकेजिङ गर्ने कार्यका लागि मुख्य निर्वाचन अधिकृतको कार्यालयमा कार्यरत कर्मचारीले नै गर्नुपर्ने छ । अर्थात् ५० वटा सम्म मतदान केन्द्र भएमा मुख्य निर्वाचन अधिकृतको कार्यालयमा खटिने जनशक्ति भन्दा बढी जनशक्ति थप गर्न पाइने छैन । ताप्लेजुङमा ७३ मतदान स्थल र १ सय २२ वटा मतदान केन्द्र रहेका छन् । ५१ देखि १ सय वटा सम्म मतदान केन्द्र भएमा मतपत्र रुजु र प्याकेजिङ गर्ने र मतदान अधिकृतलाइ मतपत्र बुझाउने कार्यका लागि भने बढीमा ७ दिन सम्मका लागि २ जना सम्म जनशक्ति थप गर्न सकिने व्यवस्था रहेको छ । यस्तै १ सय १ देखि २ सय सटा सम्म मतदान केन्द्र भएमा बढीमा ३ र २ सय १ देखि ३ सय वटा सम्ममा बढीमा ४ जना सम्म जनशक्ति थप गर्न सकिने छ ।