चेल्सी शीर्ष चारको नजिक

लन्डन,पुस ७ । टमी अब्राहमले खेलको अन्त्यतिर गरेको दुई गोलमा चेल्सीले इंग्लिस प्रिमियर लिगमा सोमबार राति वेस्ट ह्यामलाई ३–० ले हराएको छ । घरेलु मैदानमा भएको खेलमा चेल्सीले ब्राजिली डिफेन्डर थिएगो सिल्भाको गोलबाट सुरुआती अग्रता लिएको थियो । यो जितपछि चेल्सीको १४ खेलबाट २५ अंक पुगेको छ । जुन शीर्ष चारबाट एक अंकको मात्र दूरी हो । वेस्ट ह्याम भने लगातार तेस्रोपटक घरेलु मैदानबाहिरको खेल जित्न असफल रह्यो । टोली २१ अंकसहित दसौं स्थानमा छ । सोमबार रातिको अर्को खेलमा एस्ली बार्नस र क्रिस उडको गोलमा बर्नलीले उल्भ्सलाई २–१ ले हरायो । यससँगै बर्नली रेलिगेसन क्षेत्र छाड्न सफल रह्यो । टर्फ मुरमा ११ औं स्थानमा रहेको उल्भ्समाथि प्राप्त जितपछि बर्नलीको अपराजित यात्रा चार खेलसम्म पुगेको छ । टोली १३ अंकसहित १६ औं स्थानमा उक्लेको छ । आर्सनलको तुलनामा एक खेल कम खेलेर बर्नली उसको पछाडि रह्यो । उल्भ्सका लागि फाबियो सिल्भाले एक गोल फर्काए ।