मन्त्री पोखरेल नेतृत्वको कोभिड समिति निष्क्रिय
कोरोना (कोभिड–१९) भाइरस रोकथाम तथा नियन्त्रण उच्चस्तरीय समन्वय समिति निष्कृय भएको छ। उपप्रधानमन्त्री तथा रक्षामन्त्री ईश्वर पोखरेल संयोजकत्वमा बनेको उक्त समितिले सन्तोषजनक काम गर्न नसकेको भन्दै प्रधानमन्त्री केपी शर्मा ओलीले त्यसलाई निष्क्रिय बनाएका हुन्। प्रधानमन्त्री ओलीले गत बुधबार बसेको मन्त्रिपरिषद् बैठकमा सो समितिले सन्तोषजनक काम गर्न नसकेको गुनासो गर्दै निष्क्रिय पार्ने निर्णय गरेका थिए।
बैठकमा प्रधानमन्त्री ओलीले पोखरेल संयोजकत्वको उक्त समितिले काम गर्न नसकेको भन्दै कोभिड–१९ क्राइसिस म्यानेजमेन्ट सेन्टर (सिसिएमसी) लाई सक्रिय बनाउने निर्णय गरेका थिए। त्यसका लागि सिसिएमसीमा तीन मन्त्रीलाई थप गरिएको थियो। प्रधानमन्त्री ओलीले बैठकमा उच्चस्तरीय समन्वय समिति निष्क्रिय पार्नुका साथै दुई वर्ष पुगेका मन्त्रीहरुलाई सरकारबाट बिदा गर्ने संकेतसमेत गरेका थिए।
‘प्रधानमन्त्री ओलीले उच्चस्तरीय समन्वय समितिलाई खारेज नगर्ने तर निष्क्रिय बनाएर जानुपर्छ बरु सिसिएमसी सञ्चालक समितिलाई प्रभावकारी बनाउन तीनजना मन्त्री थपौं भन्ने प्रस्ताव गर्नुभयो। त्यहींबाट उच्चस्तरीय समन्वय समितिलाई निष्क्रिय पारेर सिसिएमसीलाई सक्रिय पारिएको हो’, एक मन्त्रीले भने। ती मन्त्रीका अनुुसार समन्वय समिति र सिसिएमसीको कार्यक्षेत्र एउटै देखिएको, काम पनि बाँझिएको र एकले अर्कालाई असहयोग गरेको जस्तो देखिएको भन्दै नेपाली सेनाले पटकपटक गुनासो गरेपछि प्रधानमन्त्री ओलीले सो समितिलाई निष्क्रिय बनाएका हुन्।
