फुङलिङमा ५ दिने उद्घोषण तथा भाषणकला सम्वन्धी पुर्नताजकी तालिम सुरु

उज्यालो पोष्ट
ताप्लेजुङ,चैत २२ । ताप्लेजुङको फुङलिङ नगरपालिकामा शुक्रवार(आज)बाट उद्घोषण तथा भाषणकला सम्वन्धी ५ दिने पुर्नताजकी तालिम सुरु भएको छ ।

नगरपालिका स्तरीय तालिममा नगरपालिकाका प्रत्येक वडाबाट ३–३ जनाका दरले ३३ जना महिला सहभागी रहेको नगरपालिकाको महिला तथा बालबालिका शाखा प्रमुख सीता गुरुङले जानकारी दिनुभयो । तालिमका अधिकाँस सहभागी यसअघि उद्घोषण तथा भाषणकला सम्वन्धी आधारभूत तालिम लिएका सहभागी रहेको उहाँले जानकारी दिनुभयो । गुरुङका अनुसार लैंगिक समानता तथा समावेशी कार्यक्रम अन्तरगत समूहमा आवद्ध महिला तालिममा सहभागी छन् ।

तालिमको सहजीकरण पत्रकार महासंघ ताप्लेजुङका पूर्व अध्यक्ष तथा उज्यालो पोष्ट दैनिकका सम्पादक खगेन्द्र अधिकारीले गरिरहनु भएको नगरपालिकाले जनाएको छ । तालिममा उद्घोषणकला र शैली,कार्यक्रम सूची बनाउने तरिका,मन्तब्य राख्ने तरिका,मन्तव्य राख्दा अपनाउनुपर्ने शैली र प्रकृया सहितका बिषयमा सैद्धान्तिक र अभ्यासशिक्षणमार्फत अवगत गराईने सहजकर्ता अधिकारीले जानकारी दिनुभयो ।