टीकाराम गौतम स्मृति प्रतिष्ठानद्धारा दुईव्यक्ति र रेडक्रसको एक उपशाखा पुरस्कृत

उज्यालो पोष्ट
ताप्लेजुङ,बैशाख ९ । टीकाराम गौतम स्मृति प्रतिष्ठानले आइतवार एक सञ्चारकर्मी,एक सामाजिक व्यक्तित्व र रेडक्रसको एक उत्कृष्ट उपशाखालाई पुरस्कृत गरेको छ ।

प्रतिष्ठानमार्फत पत्रकारतर्फ रेडियो तमोरमा कार्यरत मनु माङलेन मावो लिम्बू नगद १० हजार १०५ रुपैयाँ राशीसहित पुरस्कृत हुनु भएको छ । नेपाल पत्रकार महासंघ ताप्लेजुङ शाखाको सिफारिस तथा प्रतिष्ठानको निर्णय बमोजिम मावोलाई पुरस्कृत गरिएको हो । उहाँ पत्रकार महासंघ ताप्लेजुङको कार्य समिति सदस्य रहनु भएको छ । फक्ताङ्लुङ एफएमबाट पत्रकारिता यात्रा सुरु गर्नु भएकी मावो २०७५ साल देखि रेडियो तमोरमा कार्यरत रहनु भएको छ ।

यस्तै सामाजिक व्यत्तित्वतर्फ ताप्लेजुङको आठराई त्रिबेणी गाउँपालिका वडा नं ३ हाङपाङ निवासी हर्क यक्सोलाई पुरस्कृत गरिएको छ । यक्सोलाई नगद १० हजार १०५ रुपैयाँ राशीसहित पुरस्कृत गरिएको प्रतिष्ठानका सचिव प्रकाशमणि गौतमले जानकारी दिनुभयो । लामो समय सम्म शिक्षण तथा सामाजिक सेवामा आवद्ध यक्सो सरस्वती माध्यमिक बिद्यालयका सेवानिवृत प्रधानाध्यापक समेत रहनु भएको छ ।

यस्तै उत्कृष्ट रेडक्रस उपशाखा अन्तरगत यसबर्ष मैवाखोला गाउँपालिका वडा नं ३ स्थित साँघु उपशाखा पुरस्कृत भएको छ । पुरस्कृत उपशाखाको तर्फबाट साँघु उपशाखाका सभापति मधुकला चोङवाङले नगद १५ हजार १०५ रुपैयाँ राशीको पुरस्कार ग्रहण गर्नु भएको छ । नेपाल रेडक्रस सोसाईटी ताप्लेजुङ शाखाको परार्मशमा पुरस्कृत हुने उपशाखाको छनौट गर्ने गरिएको छ ।

टीकाराम गौतम स्मृति प्रतिष्ठानले हरेक बर्ष बैशाख ९ गते एक उत्कृष्ट सञ्चारकर्मी,एक सामाजिक व्यक्तित्व र ताप्लेजुङ जिल्लाभरको एक उत्कृष्ट रेडक्रस उपशाखालाई पुरस्कृत गर्दै आईरहेको छ । नेपाल रेडक्रस सोसाईटी ताप्लेजुङ शाखाका तत्कालिन सभापति टीकाराम गौतमको २०६७ साल कात्तिक ११ गते निधन भएको थियो । कार्यक्रमका प्रमुख अतिथि तथा प्रमुख जिल्ला अधिकारी रवीन्द्रप्रसाद आचार्यले उक्त तीनैबिधाका पुरस्कार बितरण गर्नु भएको छ । प्रजिअ आचार्यले हरेक व्यक्तिले गौतमप्रति देखाएको श्रद्धाभाव र सम्मान नै स्वर्गीय टीकाराम गौतमले जीवनमा गरेका योगदानको मूल्याङकनको रुपमा बुझन् सकिने बताउनुभयो । उहाँका असल कामहरुकै कारण मृत्युपर्यन्त पनि उहाँ मानिसको मनमुटुमा ररिहनु भएको प्रजिअ आचार्यको भनाई थियो ।

कार्यक्रममा पाँचथरको कुम्मायम गाउँपालिकाका उपाध्यक्ष महेन्द्रबहादुर खड्काले सामाजिक भावनाले निस्वार्थ कार्यलाई समुदायका जनजनले लामो अवधि सम्म सम्झीरहने भन्दै गौतम त्यसकै एक पर्याय भएको बताउनुभयो । टीकाराम गौतमसंग रेडक्रस सहितका सामाजिक संघसंस्थामा संगै रहेर काम गर्नु भएका ताप्लेजुङ रेडक्रस सोसाईटीका पूर्व सभापति तथा कुम्मायक गाउँपालिकाका प्रमुख प्रशासकीय अधिकृत गणेश अधिकारीले गौतमले सामाजिक क्षेत्रमा दिनु भएको योगदानको चर्चा गर्दै उहाँका असल कार्यहरुको अनुशरणबाट सामाजिक क्षेत्रमा लागेका व्यक्तिहरुले निष्ठा र इमान्दारितापूर्वक कर्तव्य निर्वाह गर्न सक्ने बताउनुभयो ।

कार्यक्रममा पुरस्कृत व्यत्तित्वहरुकोतर्फबाट यक्सो,नेपाल रेडक्रस सोसाईटीका जिल्ला सभापति इन्द्रबहादुर गुरुङ,पत्रकार महासंघ ताप्लेजुङका अध्यक्ष आनन्द गौतम,पूर्व अध्यक्ष खगेन्द्र अधिकारी,स्वर्गीय गौतमका भतिजा लेखनाथ गौतम सहितले गौतमले सामाजिक क्षेत्रमा दिनु भएको योगदानको स्मरण गर्नु भएको थियो । कार्यक्रमकैबीच प्रतिष्ठानका सचिव गौतमले बार्षिक प्रगति प्रतिबेदन प्रस्तुत गर्नु भएको थियो ।

नेपाल रेडक्रस सोसाईटी ताप्लेजुङका मन्त्री तथा प्रतिष्ठानका सदस्य विकास गौतमले आफ्ना स्वर्गीय दाजु टीकारामले देखाउनु भएको सामाजिक भावना आफुहरुका लागि पनि प्रेरणाको स्रोत भएको बताउनुभयो । कार्यक्रम प्रतिष्ठानका अध्यक्ष तोयानाथ गौतमको अध्यक्षतामा सम्पन्न भएको थियो ।