मोर्चाको जिल्ला संयोजकमा पोमु चयन

-उज्यालो पोष्ट
ताप्लेजुङ, चैत १५ । समाजवादी मोर्चा नेपाल ताप्लेजुङको संयोजकमा नेकपा (एकीकृत समाजवादी) का रामचन्द्र पोमु चयन हुनुभएको छ । आलोपालो नेतृत्व गर्नेगरी जिल्लामा समाजवादी मोर्चा नेपाल घोषणा भएअनुसार एकीकृत समाजवादीका पोमु जिल्ला संयोजकमा चयन हुनुभएको हो ।
यसअघि नेपाल कम्युनिस्ट पार्टीका असल सी जिल्ला संयोजक रहनुभएको थियो । करिव पाँच महिनापछि मोर्चाको जिल्ला संयोजक परिवर्तन गरी बिहीबार पोमुलाई जिम्मेवारी दिइएको हो । गत असोज २६ गते नेकपा (माओवादी केन्द्र) सहित चार दल सम्वद्ध समाजवादी मोर्चा नेपाल, जिल्ला समिति घोषणा गरिएको थियो ।
मोर्चामा माओवादी केन्द्र, एकीकृत समाजवादी, नेकपा र जनता समाजवादी पार्टी नेपाल आवद्ध छन् । मोर्चा घोषणा गर्दा जिल्ला समितिमा माओवादीका लक्ष्मीप्रसाद अन्छङ्बो (आवाज), सागरमणि गौतम र मनु मादेन सदस्य रहनुभएको छ । यस्तै एकीकृत समाजवादीबाट पोमुसहित छिरिङ लामा र शम्भुप्रसाद गौतम सदस्य रहनुभएको छ ।
जनता समाजवादीका तर्फबाट कीर्तिमान मादेन, सूर्य तमु र भक्त येङ्देन र नेकपाबाट असल सी, रुद्र सी र धनपति सी सदस्यमा चयन हुनुभएको छ । अब पोमुपछि मोर्चाको नेतृत्व माओवादी र जसपाले गर्ने बताइएको छ ।