गौतम प्रतिष्ठानद्धारा पत्रकार पालुङ्वा सहित दुई व्यक्ति र एकसंस्था पुरस्कृत

ताप्लेजुङ,बैशाख ९ । पत्रकार बसन्त पालुङवा सहित एकजना समाजसेवी र नेपाल रेडक्रस सोसाईटीको एक उपशाखालाई शनिवार टीकाराम गौतम स्मृति प्रतिष्ठानले पुरस्कृत गरेको छ ।

प्रतिष्ठानले पत्रकार पालुङवा र समाजसेवी ताप्लेजुङको खेवाङ घर भई हाल झापा बस्दै आउनु भएका प्रेमप्रसाद दाहाललाई पुरस्कृत गरेको हो । उत्कृष्ट कार्य सम्पादन गर्ने नेपाल रेडक्रस सोसाईटी अन्र्तगत ताप्लेजुङ भरीका उपशाखामध्ये यसबर्ष हाङ्देवा उपशाखा सम्मानित भएको छ ।

यहाँस्थित रेडियो तमोरका स्टेशन म्यानेजर समेत रहनु भएका पालुङवा अन्नपूर्णपोष्ट दैनिकमा कार्यरत रहनु भएको छ । पत्रकार महासंघ ताप्लेजुङका सहसचिव समेत रहनु भएका पालुङवालाई १० हजार १ सय ५ रुपैयाँ राशी सहित पुरस्कृत गरिएको छ । यस्तै समाजसेवी दाहाल समान १० हजार १ सय ५ रुपैयाँ राशी सहित पुरस्कृत हुनु भएको छ । सिरिजङ्गा गाउँपालिका वडा नं ७ खेवाङका दाहालले चराचुरुङगी सहितका अन्य वन्यजन्तुलाई पानी खान सहज होस् भनेर जंगलको बीचमा रहेको ढुङ्गा खोपेर ठाउँठाउँमा पानी जमाउने पोखरी बनाउनु भएको थियो । उहाँको यो कार्यको ब्यापक प्रशंसा भएको थियो ।

यस्तै उत्कृष्ट कार्य सम्पादन गर्ने नेपाल रेडक्रस सोसाईटीको हाङ्देवा उप शाखालाई नगद १५ हजार १ सय ५ रुपैयाँ सहित सम्मान गरिएको प्रतिष्ठानका उपाध्यक्ष विकास गौतमले जानकारी दिनुभयो । रेडक्रसका उपशाखा सभापति डिल्ली घिमिरेले पुरस्कार ग्रहण गर्नुभयो । प्रदेश सरकारका पूर्व मन्त्री प्रतापप्रताप हाङ्गामले तीनवटै पुरस्कार बितरण गर्नु भएको छ ।

सम्मानकैबीच प्रतिष्ठानले आफ्नो बार्षिक प्रगति प्रतिबेदन समेत प्रस्तुत गरेको छ । प्रतिष्ठानका सचिव एवम् स्वर्गीय टीकाराम गौतमका जेठा छोरा प्रकाशमणि गौतमले बार्षिक प्रगति प्रतिबेदन प्रस्तुत गर्नु भएको छ । कार्यक्रममा टीकाराम गौतमका दाजु तथा नेपाल रेडक्रस सोसाईटीका केन्द्रीय सदस्य बासुदेव गौतम,नेपाल रेडक्रस सोसाईटी ताप्लेजुङ शाखाका सभापति इन्द्रबहादुर गुरुङ र पत्रकार महासंघ ताप्लेजुङका अध्यक्ष आनन्द गौतम सहितले स्वर्गीय गौतमको योगदानको चर्चा गर्नु भएको थियो ।

रेडक्रसको जिल्ला सभापति रहेकै बखत २०६६ कातिक ११ गते निधन हुनु भएका गौतमको परिवारले उहाँको स्मृतिमा प्रतिष्ठान खोलेर सामाजिक सेवा,पुरस्कार तथा सम्मान बितरण गर्दै आईरहेको छ । गौतमको २०१३ बैशाख ९ गते जन्म भएको थियो । यहि जन्मदिनको अवसर पारेर बर्षेनि पुरस्कार तथा सम्मान बितरणको कार्यक्रम राखिएको टीकाराम गौतम स्मृति प्रतिष्ठानका अध्यक्ष तोयानाथ गौतमले जानकारी दिनुभयो ।

Similar Posts