मौसमी जोखिमबाट सुरक्षित रहन स्थानीय प्रशासनको आग्रह

-उज्यालो पोष्ट
ताप्लेजुङ, कात्तिक ११ । स्थानीय प्रशासनले हिमाली जिल्ला ताप्लेजुङमा मौसमी जोखिमबाट सुरक्षित रहन सबै नागरिकलाई आग्रह गरेको छ । वर्षा र हिमपातजन्य विपतमा परी ज्यानसमेत जान सक्ने भएकाले स्थानीय प्रशासनले उक्त जोखिमबाट सुरक्षित रहन सबैलाई आग्रह गरेको हो ।
प्रमुख जिल्ला अधिकारी शिवराज सेढाइँले मंगलबार बिहान सूचना प्रकाशित गर्नुहुँदै हिमपातजन्य मौसमी जोखिमबाट सुरक्षित रहन सबै नागरिकलाई आग्रह गर्नुभएको छ । जल तथा मौसम विज्ञान विभागले जारी गरेको बुलेटिनअनुसार बुधबारसम्म विभिन्न क्षेत्रमा वर्षा र हिमपातको सम्भावना रहेको उल्लेख गरेकाले जोखिमबाट सतर्कता आउनुपर्ने प्रजिअ सेढाइँले सूचनामा जनाउनुभएको छ ।
कञ्चनजंघा हिमालसहित पर्यटकीय गन्तव्यहरु रहेको जिल्ला र अहिले पर्यटकीय मौसम भएकाले हिमपातजन्य जोखिमबाट पर्यटक नै बढी प्रभावित हुनसक्ने भएकाले सतर्कता अपनाउन आग्रह गरिएको छ । कञ्चनजंघा सहितका गन्तव्यको भ्रमण गर्ने बाह्य तथा आन्तरिक पर्यटक, पदयात्री, पाथीभरासहित तीर्थस्थलको दर्शन गर्ने तीर्थयात्री र अहिलेको मौसममा विभिन्न क्षेत्रको भ्रमण गर्न निस्किएका नागरिकलाई सतर्कता अपनाउन प्रजिअ सेढाइँले आग्रह गर्नुभएको छ ।
यस्तै जिल्लाको हिमाली भेगमा बसोबास गर्ने नागरिकलाई पनि वर्षा र हिमपातका कारण आइपर्ने जोखिम र जाडोबाट जोगिएर बस्न अर्थात सतर्कता अपनाउन साथै सुरक्षित रहन स्थानीय प्रशासनले आग्रह गरेको छ । सम्भावित जोखिम रहेको क्षेत्रमा भ्रमण तथा यात्रा नगर्न र यात्रा गर्नैपर्ने भएमा मौसमी अवस्थालाई ख्याल गरेर मात्र भ्रमण साथै यात्रा गर्न स्थानीय प्रशासनको सुझाव रहेको छ ।
यता मौसम भने सोमबार रातिदेखि नै धुम्मिएको छ भने मंगलबार बिहान सदरमुकाम फुङ्लिङ बजारमा फाट्टफुट्ट वर्षा भएको छ । जिल्लाको उच्च हिमाली भेगमा हिमपातसमेत सुरु भएको स्थानीयले बताएका छन् । मौसम धुम्मिएका कारण जिल्लामा जाडो पनि बढेको छ ।